“Ndërhyrjet estetike dhe lobimi në SHBA”- Zbulohen arsyet pse Meta u thirr në SPAK

Gazetarja e Euronews Albania, Sara Demushi, ka zbardhur detaje të reja në lidhje me thirrjen në SPAK këtë të enjte të kreut të Partisë së Lirisë, Ilir Meta.

Demushi zbuloi se Meta po merret në pyetje nga prokurori Sotir Kllapi, i cili është prokurori që po heton shpenzimet e ndërhyrjeve estetike të anëtarëve të familjes Meta, por dhe lobimin në SHBA të bërë nga ish-LSI-ja.

Këto dy hetime sipas gazetares janë bashkuar në një dosje të vetme, ku organi i akuzës po shkon drejt përfundimit të hetimeve dhe kalimit në gjykatë të çështjes.

“Ilir Meta ndodhet në Prokurorinë e Posaçme ku është duke u marrë në pyetje nga prokurori Sotir Kllapi, bëhet fjalë për të njëjtin prokuror që 1 ditë më parë ka marrë për 5 orë në pyetje ditën e djeshme, Monika Kryemadhin. Çështjet për të cilat Meta është thirrur pranë organit të akuzës janë shpenzimet e padeklaruara për ndërhyrjet estetike si dhe çështja për lobimin në SHBA të cilat janë bashkuar në një hetim. Kujtojmë se Meta është thirrur dhe dy herë të tjera në SPAK për hetimet në lidhje me aferën CEZ/DIA.”, tha Demushi.

Në kuadër të këtyre hetimeve në prill 2024, SPAK mori në pyetje dhe nënën e Monika Kryemadhit, Fatime Kryemadhi.

E ëma e deputetes së Partisë së Lirisë pranoi asokohe se ishte në SPAK për të dhënë sqarime në lidhje me pasurinë e saj.

LEXONI GJITHASHTU:

• Kryemadhi del pas 5 orësh nga SPAK: Kam bërë botoks si gjithë femrat
• Monika Kryemadhi thirret në SPAK
• Monika Kryemadhi ankimon në SPAK sekuestrimet, përfaqësohet në GJKKO nga avokati