SHBA përgënjeshtron Hezbollahun: S’e ndalojmë dot Izraelin në sulmojë Libanin

I dërguari i SHBA-së Amos Hochstein u tha zyrtarëve libanezë gjatë një vizite në Bejrut se grupi militant libanez Hezbollah e ka gabim kur mendon se SHBA mund të pengojë Izraelin të sulmojë Libanin nëse grupi vazhdon të sulmojë territorin izraelit, thanë burime të mirëinformuara për portalin amerikan “Axios”.

Hochstein i kërkoi kryetarit të parlamentit libanez t’i përcjellë një mesazh udhëheqësit të Hezbollahut, Hassan Nasrallah se supozimi i tij se SHBA-ja kontrollonte Izraelin ishte i gabuar, thanë burimet.

Sipas burimeve, Hochstein tha se Hezbollahu duhet të negociojë në mënyrë indirekte me Izraelin, në vend që të rrisë tensionet.

Një diplomat perëndimor i paidentifikuar tha se pas vizitës së Hochstein, Hezbollahu dërgoi mesazhe në SHBA përmes palëve të treta duke thënë se megjithëse grupi nuk dëshironte luftë, ishte gjithashtu i sigurt se mund t’i jepte një goditje të rëndësishme Izraelit nëse Libani sulmohej.

Hochstein udhëtoi për në Liban javën e kaluar nga Izraeli pas bisedimeve me kryeministrin izraelit Benjamin Netanyahu dhe ministrin e mbrojtjes Yoav Galant.

“Situata është serioze. Ajo që Presidenti Biden dëshiron të bëjë është të shmangë përshkallëzimin e mëtejshëm në një luftë më të madhe”, tha Hochstein përpara se të largohej nga Bejruti të martën e kaluar për të takuar Netanyahun për herë të dytë në Jerusalem.