OBSH: 2.6 milionë vdekje në vit janë të lidhura me alkoolin

Njerëzit kanë më shumë gjasa të vdesin nga problemet e lidhura me alkoolin në Evropë se kudo tjetër, tregon një raport i ri nga Organizata Botërore e Shëndetësisë (OBSH).

Në nivel global, pati 2.6 milionë vdekje të lidhura me alkoolin në vitin 2019, një rënie prej 2.5 për qind nga viti 2010, por ende numrat janw tw lartw.

Rajoni evropian kishte shkallën më të lartë të vdekjeve të lidhura me alkoolin – 52.9 për 100,000, pak mbi Afrikën 52,2 për 100,000 – si dhe shkallën më të lartë në botë të çrregullimit të përdorimit të alkoolit, me 10.7 për qind, megjithëse prevalenca ka rënë në vitet e fundit.

Shkalla e çrregullimit të përdorimit të alkoolit është ulur gjithashtu në Amerikën dhe vendet e Paqësorit Perëndimor, ndërsa është rritur në rajonet e Afrikës, Mesdheut Lindor dhe Azisë Juglindore.

Në përgjithësi, rreth 400 milionë njerëz kishin çrregullime të përdorimit të alkoolit, i cili rrit rrezikun e sëmundjeve të tretjes dhe kardiovaskulare, epilepsisë, kancerit, lëndimeve dhe problemeve të tjera shëndetësore.

Ndër 10 vendet me konsumin më të lartë të alkoolit për frymë, shtatë ishin vende anëtare të Bashkimit Evropian.

OBSH synon të frenojë pirjen e tepërt, veçanërisht në mesin e adoleshentëve – por nuk përcakton pika të veçanta të të dhënave ose kritere që duhet të përmbushin vendet individuale. Deri në vitin 2030, OBSH dëshiron që “përdorimi i dëmshëm i alkoolit” të ulet me 20% krahasuar me vitin 2010.

LEXO GJITHASHTU:

• OBSH ngre alarmin: Antibiotikët nuk po japin më efekt si dikur
• 1 në 5 adoleshent obez, OBSH: Shkak kequshqyerja dhe mungesa aktivitetit fizik