Greqia gati për hapjen e turizmit, Rezhda: Shpresë e shtuar për ekonominë

Nga dita e sotme, në Greqi dyqanet e vogla me pakicë që shesin mallra jo-thelbësore  rihapin dyert për t’i shërbyer konsumatorëve pas muaj të tërë izolimi.

Masa përjashton qendrat tregtare dhe dyqanet në zonën e Athinës, Selanikun ku do të qëndrojnë të mbyllura.

Gjithsesi, lehtësimi i masave ka ngjallur shpresën tek qytetarët dhe kjo pritet të reflektojë në rimëkëmbjen e ekonomisë.

Ekspertja ligjore dhe njëkohësisht përfaqësuese e shqiptarëve në Selanik, Anila Rezhda, tha se qeveria greke ka caktuar datën 14 maj për hapjen e sezonit turisik.

Por, ky komunikim thotë ajo është i shoqëruar me një shënim, në të cilin theksohet se kjo do jetë e mundur nëse përmirësohet situata.

“Këto masa e lodhin qytetarin, por janë komerdarja që mund të shpëtojë situatën ekonomike. Në një komunikim zyrtar të qeverisë greke u tha në “14 maj çelim  sezonin turistik”, por çdo njoftim zyrtar këtej e tutja shoqërphet me një nëntekst, i cili thotë gjithmonë po na lejuan kushtet. Data zyrtare e hapjes së turizmit është 14 maj. Ky komunikim u dha shumë gëzim zonave turistike”, tha ajo.

Znj. Rezhda thekson se ky është një lajm i mirë edhe për qytetarët shqiptarë, të cilët punojnë në sektorin e turizmit.

Referuar parashikimeve të institucioneve të shteti fqinj, znj. Rezhda u shpreh për Euronews Albania se kriza që ka shkaktuar Covid-19 mund të tejkalohet në vitin 2022.

“Ka shumë shqiptarë që punojnë në këtë sektor dhe dëshirojmë, që kjo datë të shënojë hapjen e turizmit. Ka rritje të papunësisë dhe kjo shkon paralelisht me shtetasit shqiptarë dhe ato grekë. Dëmet e ekonomisë parashikohet të jenë të tejkalueshme në vitin 2022”, tha ajo.