Spanjë, sekuestrohet narko-nëndetësja që transportonte 900 kg kokainë

Agjentë të Policisë Kombëtare, Doganave dhe Gardës Civile në Spanjë kanë lokalizuar një nëndetëse droge 280 milje në perëndim të lokalitetit Kadiz dhe kanë arrestuar 4 anëtarët e ekuipazhit, në një operacion gjatë të cilit u sekuestruan 900 kg kokainë.

Katër anëtarët e ekuipazhit, të gjithë shtetas kolumbianë, u shpëtuan në mes të detit pasi kur konstatuan afrimin e varkave të oficerëve e fundosën nëndetësen që po transportonte dhe drogën, e cila u konfiskua kur pakot e saj dolën në sipërfaqe.

Operacioni për lokalizimin e nëndetëses kishte filluar rreth një muaj më parë, kur Administrata amerikane e Antidrogës, DEA, kishte paralajmëruar për trafikimin e një ngarkese të madhe droge nga Amerika Latine.

Pas rritjes së vigjilencës, nëndetësja 20 metra e gjatë dhe gjysmë e zhytur u lokalizua rreth 280 milje në perëndim të lokalitetit Kadiz. Ekuipazhi i mjetit, kur konstatoi ardhjen e patrullave detare hapi hyrjet e poshtme të saj duke e fundosur bashkë me ngarkesën. Si 4 shtetasit kolumbianë, edhe lënda narkotike u sekuestruan më pas në sipërfaqe.

Për më shumë se 6 orë dhe në kushte të vështira meteorologjike, patrullat ndoqën dhe kontrolluan nëndetësen dhe një varkë që e shoqëronte. Tani, të dyshuarit, nëndetësja dhe lënda narkotike janë vendosur në dispozicion të hetuesve të Prokurorisë spanjolle të Antidrogës, të cilët do të vazhdojnë hetimet.

LEXONI GJITHASHTU:

• Raporti i Antimafias: Grupet shqiptare negociojnë me kartelet e kokainës
• Laboratori me kokainë në Frakull, GJKKO jep vendimin për 10 të pandehurit (Emrat)