Raporti i Antimafias: Grupet shqiptare negociojnë me kartelet e kokainës

Në raportin e Drejtorisë Hetimore të Antimafias (DIA), thuhet se organizatat kriminale shqiptare përbëjnë një rrezikshmëri të lartë dhe një prani të theksuar në aktivitetet e paligjshme, në veçanti në trafikun e drogës.

Ky raport ka analizuar situatën për 6-mujorin e parë të vitit 2023.

“Bëhet fjalë për grupe të strukturuara mirë dhe të mbështetura tek solidariteti mes tyre, pasi bazohen në lidhje familjare”, nënvizon raporti.

Sipas tij, organizatat shqiptare janë përshtatur mirë edhe në nivel ndërkombëtar, pasi janë në gjendje të negociojnë në mënyrë direkte me kartelet amerikano-jugore, në vendet prodhuese, të sasive të mëdha të kokainës.

“Shumë operacione anti-drogë të kryera në rajone të ndryshme italiane kanë vërtetuar gjithashtu veprimin e tyre në sinergji me kriminalitetin autokton”, vijon dokumenti i Antimafias.

Në të shtohet më tej se, këto organizata me kapacitete ndërkombëtare transportojnë nga brigjet shqiptare në territorin italian, përmes gomoneve dhe mjeteve të tjera lundruese, emigrantë të etnive të ndryshme, kryesisht iranianë, pakistanezë, irakenë, egjiptianë, sirianë dhe afganë.

Në këtë lloj trafiku, aksi i preferuar mbetet Kanali i Otrantos, përfundon raporti.

LEXONI GJITHASHTU:

• Asgjësohet karteli ballkanas: Kapen 8 tonë kokainë, drejtohej nga Dubai
• “Pijet energjike varësi si kokaina”, mjekët: Fëmijët i konsumojnë çdo ditë, ja dëmet