Protesta e opozitës “blindon” Tiranën, 1100 forca policie në terren

Ditën e sotme në orën 20:00 përpara Kryeministrisë do të mbahet protesta e thirrur nga Partia Demokratike dhe aleatët e saj.

Opozita ka kërkuar 4 orë leje për protestën, pra nga ora 20:00 deri në mesnatë. Policia ka marrë një plan të gjerë masash për mbarëvajtjen e protestës.

Sipas burimeve për Euronews Albania, bëhet me dije se mbi 1100 forca policie do të jenë në terren.

Po ashtu mësohet se në afërsi të Piramidës do të qëndrojnë forcat “Shqiponja” dhe “Forcat e Sigurisë Kombëtare”.

Disa nga rrugët pranë vendit ku do të zhvillohet protesta do të jenë të bllokuara, siç tregohet edhe më poshtë.

Njoftimi i Policisë:

Drejtoria Vendore e Policisë Tiranë, në zbatim të detyrave të përcaktuara në planin e masave të hartuar nga Policia e Shtetit, ka marrë masat e nevojshme, me qëllim garantimin e rendit dhe sigurisë, para, gjatë dhe pas përfundimit të tubimit që do të zhvillohet ditën e sotme, më datë 11.07.2024, në orën 20:00, përpara Kryeministrisë.

Njoftojmë qytetarët se duke filluar nga sot, në orën 18:00, deri në përfundim të tubimit, nuk do të lejohet qarkullimi i automjeteve, në rrugët e poshtëshënuara:

Bulevardi “Dëshmorët e Kombit”, sheshi “Nënë Tereza”, rruga “Ismail Qemali”, kryqëzimi i Rrugës së Elbasanit me rrugën “Ibrahim Rugova”, rruga “Papa Gjon Pali II”, bulevardi “Zhan D’Ark” dhe bulevardi “Bajram Curri”, nga kryqëzimi i Rrugës së Elbasanit me rrugën “Ibrahim Rugova”.

Policia kërkon mirëkuptimin e qytetarëve që të shmangin lëvizjen me automjete në këto akse rrugore dhe të përdorin rrugë alternative, për të mos penguar lëvizjen e lirë të pjesëmarrësve në tubim.

Drejtoria Vendore e Policisë Tiranë respekton plotësisht të drejtën e qytetarëve për të organizuar dhe për të marrë pjesë në tubime dhe i bën thirrje organizatorëve, drejtuesve, pjesëmarrësve në tubime, dhe perfaqësuesve të subjekteve politike, që të ushtrojnë të drejtën e tyre në perputhje me Kushtetutën dhe legjislancionin në fuqi.

Në këtë kuadër, Policia e Tiranës bën thirrje për të gjithë pjesëmarrësit në tubim, që të distancohen nga çdo akt që cenon sigurinë dhe jetën e tyre, dhe çdo akt dhune ndaj punonjësve të Policisë, përfaqësuesve të mediave apo vetë pjesëmarrësve.

Policia garanton qytetarët se ka marrë të gjitha masat në përmbushje të përgjegjësive institucionale, për garantimin e rendit dhe të sigurisë, para, gjatë dhe pas përfundimit të tubimit, si dhe për garantimin e sigurisë rrugore, në të gjithë territorin e vendit, veçanërisht në sheshet dhe në segmentet rrugore, në të cilat do të zhvillohet tubimi.

LEXONI GJITHASHTU:

• Nesër protesta e opozitës para Bashkisë së Tiranës, Policia publikon masat e marra
• Incidenti te protesta e opozitës, zyrtari i PD përfshihet papritur nga flakët