Kurti pas protestës së serbëve në Veri: Asnjë incident, urat na bashkojnë

Kryeministri i Kosovës, Albin Kurti, ka reaguar pas protestës të mbajtur ditën e sotme nga serbët në Mitrovicën e Veriut.

Përmes një postimi në faqen e tij në Facebook, Kurti shkruan se protesta u mbyll pa asnjë incident.

Kurti ftoi qytetarët serbë që të marrin pjesë në një diskutim të përbashkët që do të mbahet me organizim të komunës së Mitrovicës së Veriut, ku do të informohen për bashkëpunimin ndëretinik dhe mes institucioneve e shoqërisë civile.

Ai tha gjithashtu se pavarësisht se Urës mbi Ibër i është vënë epiteti i ndasisë, sipas Kurtit ajo i bashkon komunitetet atje.

Reagimi i Kurtit:

Protesta e mbajtur sot në Mitrovicë të Veriut përfundoi pa asnjë incident. I falënderoj institucionet e sigurisë që garantuan mbarëvajtjen e qetë të saj. Protestat janë e drejtë demokratike të cilën e gëzojnë dhe mund ta ushtrojnë të gjithë qytetarët e Republikës sonë, pa dallim.

Komuna e Mitrovicës së Veriut nesër prej orës 11:00, në hapësirat e Kuvendit Komunal, organizon takim dhe bashkëbisedim me qytetarë, aktivistë të shoqërisë civile dhe përfaqësues të mediave lokale me temën “Bashkëpunimi ndëretnik, këshillim komunal për siguri në bashkësi, bashkëpunimi në mes të institucioneve dhe shoqërisë civile”.

I ftoj bashkëqytetarët tanë të komunitetit serb që të marrin pjesë në këtë diskutim të përbashkët në të cilin do të mund të njoftohen mbi përfitimet nga hapja e urës dhe të shprehin shqetësimet e tyre të cilat do të trajtohen nga përfaqësuesit tanë institucionalë dhe institucionet e vendit.

Për shumë gjatë Ura e Mitrovicës mbi Ibër na ka mbajtur në distancë. Asaj padrejtësisht i është dhënë epiteti i ndasisë dhe marrëdhënieve jonormale. Urat na bashkojnë, e bashkë le ta bëjmë atë simbol të normalizimit.

LEXONI GJITHASHTU:

• Incidenti i Vjosa Osmanit në Shkup, Kurti: Nuk synojmë tensionimin
• QUINT dhe NATO nuk e mbështetën, Kurti ngul këmbë në hapjen e urës së Ibrit