Donald Trump flet në Dhomën e Përfaqësuesve, Nancy Pelosi i gris fjalimin

“Armiqtë e Amerikës kanë marrë arratinë, pasuria e Amerikës po rritet dhe e ardhmja e Amerikës po shkëlqen. Vitet e rënies ekonomike kanë përfunduar”. Është kjo situata e  Shteteve të Bashkuara të Amerikës e prezantuar me plot optimizëm nga Presidenti Donald Trump  gjatë fjalimit të tij kombëtar në Dhomën e Përfaqësuesve.

Fjalimi i tij i tretë si president mbi situatën aktuale të Amerikës u bazua tek ekonomia dhe arritjet e administratës së tij. Fjalim ky,  i cili herë pas here ndërpritej nga duartrokitjet.

“Në vetëm tre vite  ne hodhëm poshtë  mentalitetin e rënies amerikane dhe kemi refuzuar reduktimin  e fatit të Amerikës. Ne e kemi refuzuar plotësisht një ulje të tillë. Ne po ecim përpara me një ritëm i cili vetëm pak kohë më parë  ishte i paimagjinueshëm dhe ne nuk kthehemi kurrë më mbrapa”-tha z. Trump.

I ngjashëm me një fjalim elektoral kreu i Shtëpisë së Bardhë renditi arritjet e administratës së tij  duke nënvizuar se janë krijuar vende të reja pune dhe pavarësisht kundërshtisë në sallë ai theksoi se nuk do të lejojë asnjëherë që socializmi të shkatërrojë kujdesin shëndetësor të Amerikës.

“Jam  i emocionuar t’ju  raportoj se ekonomia jonë është më e mira që ka qenë ndonjëherë, ushtria jonë është rindërtuar plotësisht duke qenë e pakrahasueshme kudo në botë, kufijtë tanë janë të sigurt, familjet tona po lulëzojnë , vlerat tona janë përtërirë, krenaria jonë është rikthyer dhe për të gjitha këto arsye, unë i them popullit të vendit tonë të madh dhe anëtarëve të Kongresit, shteti ynë  është më i fortë se kurrë më parë “.

Por  nuk mungoi mbështetja në sallë ndaj Presidentit në Trump ku  republikanët u dëgjuan të thërrisnin edhe katër vite të tjera  duke nënkuptuar për një tjetër mandat të Trump në zgjedhjet presidenciale të nëntorit.

 Në sallë nuk mungoi edhe familja e presidentit zonja e parë Melania Trump, vajza Ivanka dhe bashkëshorti i saj Kushner.

Por ajo çka u vu re në këtë fjalim i cili zgjati plot 80 minuta, ishte fakti se presidenti Trump nuk u ndal aspak tek gjyqi që po zhvillohet në senat për shkarkimin  e tij e ku gjatë kësaj të mërkure pritet të votohet nëse do të shkarkohet apo jo edhe pse mundësitë janë të pakta, pasi senati dominohet nga republikanët.

Një tjetër moment pikant i fjalimit të Trump ishte raporti i tij me kryetaren e Dhomës së Përfaqësuesve, znj. Nancy Pelosi një nga figurat kryesore që ka kërkuar shkarkimi e tij.  

Në fillimi të fjalimit  Presidenti i SHBA, z. Donald Trump refuzoi t’i shtrëngonte dorën Pelosit të cilës i dha edhe një kopje të fjalimit të tij. Por, reagimi i saj  vjen në fund të fjalimit, ku Pelosi  zgjodhi të griste kopjen që i kish dhënë  Presidentit Trump. Ajo e quajti fjalimin e Presidentit Donald Trump si një “fjalim të pisët”.

[instagram_feed=B8LZHLkotLr]