Kanoset me armë 32-vjeçari në mes të rrugës në Tiranë, policia në kërkim të autorit

Një 32-vjeçar është kanosur me armë zjarri mbrëmjen e së hënës në Rrugën e Dibrës në kryeqytet. Policia bën me dije se ende nuk është identifikuar personi që kanosi të riun si dhe motivi i ngjarjes.

Hetuesit po vijojnë kqyrjen e kamerave të sigurisë për identifikimin e autorit dhe arrestimin e tij.

Materialet u referuan në prokurorinë e Tiranës për veprat penale “Kanosja” dhe “Mbajtja pa leje dhe prodhimi i armëve, armëve shpërthyese dhe i municionit”.

“Specialistët për Hetimin e Krimeve të Komisariatit të Policisë Nr. 4 kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë për veprat penale “Kanosja” dhe “Mbajtja pa leje dhe prodhimi i armëve, armëve shpërthyese dhe i municionit”, parashikuar nga nenet 84 dhe 278/1 të Kodit Penal pasi më datë 27.08.2024, rreth orës 21:30, në Rrugën  e Dibrës, një shtetas ende i paidentifikuar dyshohet se ka kanosur me armë zjarri shtetasin R. G., 32 vjeç, banues në Tiranë. Punohet për identifikimin e kapjen e autorit dhe sqarimin e rrethanave të ngjarjes”, thuhet në njoftimin e policisë.