Emri| Vritet me armë shqiptari në Belgjikë, plagoset rëndë kushëriri i tij 19-vjeçar

Një ngjarje e rëndë ka ndodhur në Bruksel, Belgjikë, ku pas një konflikti të ashpër për një vend parkimi mbeti i vdekur një 43-vjeçar shqiptar.

Sipas burimeve për mediat e huaja, emigranti 43-vjeçar, baba i tre fëmijëve, i identifikuar si Shpëtim Ayvazi, raportohet nga mediat në Belgjikë se u qëllua për vdekje me armë zjarri nga fqinji i tij 61-vjeçar me origjinë italiane, Renato F.

Gjithashtu mësohet se mbeti i plagosur dhe ndodhet në rrezik për jetën edhe kushëriri 19-vjeçar i shqiptarit.

Autori synoi me plumba njëkohësisht gruan e viktimës dhe djalin e saj 15-vjeçar, të cilët fatmirësisht arritën të shpëtonin.

Shkak i ngjarjes së rëndë u bënë grindjet e përsëritura dhe përplasjet për vendparkimin e furgonit të viktimës. Ayvazi mori një plumb vdekjeprurës në kokë, teksa i dyshuari e qëlloi nga trotuari i rrugës, poshtë banesës, kur 43-vjeçari po parkonte furgonin.

Vendi ku ndodhi krimi

Ngjarja ka ndodhur rreth orës 20:00 të mbrëmjes së diel (25 Gusht), në rrugën “Blijde Inkomststraat”, në Machelen, një komunë periferike e Brukselit.

Policia belge arriti të identifikojë dhe arrestojë autorin e dyshuar pas krimit, i cili rezulton të ketë qenë banor i zonës.

Po ashtu bëhet e ditur se viktima punonte si murator në ndërtim, cilësohej si person i qetë, kurse i dyshuari ishte i divorcuar dhe punonte si hidraulik. Ai jetonte i vetëm, në apartamentin ngjitur me 43-vjeçarin shqiptar.

LEXONI GJITHASHTU:

• Siguroi kushte për vrasjen e Dumanit, jepet masa e sigurisë për Arben Lamçjan
• I dënuar me 25 vjet burg për vrasje, ndërron jetë në QSUT i “forti i Vlorës”