Pritet një javë me reshje, meteorologu Osmani tregon se si do të jenë temperaturat

Meteorologu i Meteoalb, Hakil Osmani tha në Euronews Albania se moti gjatë kësaj jave do të jetë i paqëndrueshëm, kryesisht në mesjavë.

Siç sqaroi meteorologu, pavarësisht se java ka nisur e kthjellët, e marta do të sjellë vranësira duke nisur kryesisht me zonat veriore.

E mërkura do të ketë reshje shiu ndërkohë që përmirësimin e motit do e vëmë re gjatë të enjtes dhe të premtes por Osmani sqaroi se do të jetë i përkohshëm duke qenë se kka sinjale që fundjava të ketë prezencë të reshjeve.

“Sa i përket vlerave termike, gjatë ditës së sotme dhe të nesërme mbeten të larta. Pritet një rënie e ndjeshme e vlerave termike në fundjavë duke bërë që të zbresin deri në 0 gradë Celcius vlerat minimale në zonat malore,” – tha meteorologu.

Kosova dhe Maqedonia e Veriut, mbeten me prezencë të vranësirave ndërkohë që mbrëmja e të martës deri të mërkurën do të ketë reshje të pakta. Edhe në dy shtetet fqinje fundjava do të ketë prezencë reshjesh dhe rënie të ndjeshme të temperaturave.

Pyetur nga gazetarja Mulaj se kur duhet të përgatitemi për pranverën, Hakil Osmani u shpreh se jemi në kushtet e një pranvere normale, stinë e cila ngjason me vitet 90’, ndryshe nga pranverat e dekadave të fundit të cilat kanë qenë në vlera termike të larta.

LEXONI GJITHASHTU: 

• Moti në Shqipëri, çfarë parashikojnë meteorologët për këtë javë
• Muaji i shenjtë i Ramazanit, Taulant Bica: Ceremonitë fetare do kryhen duke respektuar masat anti-COVID