“Autorët hapën zjarr nga makina” – Vocaj zbardh dinamikën e atentatit në Don Bosko

Kreu i policisë së Tiranës Tonin Vocaj, në një deklaratë për mediat lidhur me atentatin me 2 të plagosur në “Don Bosko” tha se policia po heton intensivisht, ka pamje filmike dhe një ide të qartë për dinamikën e ngjarjes.

Vocaj tregoi se në vendngjarje janë sekuestruar 7 gëzhoja, dyshohet se kanë qenë 3 persona që kanë marrë pjesë në atentat, të cilët kanë hapur zjarr nga automjeti.

“Jemi duke kontrolluar në të gjithë zonën për kamerat e sigurisë. Është gjetur një automjet i djegur, janë identifikuar targat e automjete që nuk janë të vjedhura, por numri i shasisë nuk përputhet me automjetin. Në vendngjarje janë sekuestruar 7 gëzhoja, nuk është përcaktuar tipi i armës së përdorur dhe brenda automjetit të djegur është gjetur edhe një armë zjarri. Dy të plagosurit ishin në të njëjtën tavolinë, 22-vjeçari nuk është kamarier, kanë qenë duke pirë kafe, lidhje vetëm shoqërore. Dyshohet se kanë qenë 3 persona që kanë marrë pjesë në atentat. Autorët kanë qëlluar nga automjeti, nuk kanë zbritur. Kemi pamje filmike dhe një ide të qartë për dinamikën e atentatit”, tha Vocaj.

Dy persona mbetën të plagosur me armë zjarri në një atentat të ndodhur të martën në zonën e Don Boskos në Tiranë, në një kafene ngjitur me zyrat e OSHEE.

Një person ka qëlluar me pistoletë në drejtim të lokalit duke lënë të plagosur shtetasit Kastriot Elezaj, 45 vjeç dhe Ronaldo Metushi, 22 vjeç.

Burime për Euronews Albania bëjnë me dije se në makinën tip Golf që dyshohet se u përket autorëve të atentatit dhe është gjetur e djegur në fshatin Çerek, është gjetur dhe një armë e gjatë, dyshohet kallashnikov.

LEXONI GJITHASHTU:

• Atentati me armë zjarri në “Don Bosko”, si paraqitet gjendja e të plagosurve
• EMRAT| Të shtëna me armë zjarri në Tiranë, 2 persona të plagosur