Policia vret një person të armatosur pranë konsullatës izraelite në Mynih

Një person i armatosur është qëlluar për vdekje nga policia gjermane pranë qendrës së dokumentacionit nazist dhe konsullatës izraelite në qytetin jugor të Mynihut.

Burri u ekzekutua gjatë një shkëmbimi zjarri me policinë. Ministri i Brendshëm bavarez Joachim Herrmann konfirmoi në një deklaratë për mediat vdekjen e tij.

Policia tha se personi në fjalë ishte duke mbajtur një armë zjarri të gjatë dhe shkëmbeu zjarr me 5 efektivë të policisë.

Policia rrethoi zonën përreth Karolinenplatz, afër qendrës së qytetit.

Njerëzve iu tha të shmangnin zonën përreth dhe ndërkohë këshilloi personat që banonin aty pranë të mos dilnin nga banesat.

Një helikopter policie qarkulloi mbi zonë dhe publikut iu kërkua të mos postonte imazhe të incidentit në mediat sociale.

Pas të shtënave, policia vendosi të rrisë sigurinë në sinagogën kryesore të Mynihut, sipas raporteve lokale.

Incidenti ndodhi 52 vjet pas sulmit të vitit 1972 ndaj atletëve izraelitë nga persona të armatosur nga grupi militant palestinez Shtatori i Zi.

Njëmbëdhjetë atletë dhe një oficer policie u vranë në kalvarin e pengjeve.

Konsullata izraelite u mbyll në kohën e të shtënave, sepse po mbante një ceremoni përkujtimore për ata që vdiqën në vitin 1972. Askush në konsullatë nuk u lëndua.