U prezantua si zyrtar e zhvati 3 milionë lekë, skema që përdori 57-vjeçari në Lezhë

Një 57-vjeçar ka rënë në prangat e Policisë në Lezhë, pasi ishte përfshirë në një skemë mashtrimi për përfitimin e parave nga operatorët ekonomikë.

Përmes një njoftimi Policia bën të ditur se 57-vjeçari përfitoi 3 milionë lekë nga administratori i një subjekti privat, pasi komunikoi përmes aplikacionit “Signal” me të në emër të përfaqësuesit të një institucioni vendor.

Ndërkohë vijojnë hetimet për identifikimin dhe kapjen e shtetasve të tjerë të përfshirë në këtë skemë mashtrimi.

Njoftimi i Policisë:

DVP Lezhë/Finalizohet në bashkëpunim me Drejtorinë e Forcës së Posaçme Operacionale, operacioni policor i koduar “Flop”, për zbardhjen e një skeme mashtrimi për përfitimin e parave nga operatorët ekonomikë.

Përfitoi 3 000 000 lekë nga administratori i një subjekti privat, pasi komunikoi me të në emër të përfaqësuesit të një institucioni vendor, vihet në pranga 57-vjeçari.

Vijojnë hetimet për identifikimin dhe kapjen e shtetasve të tjerë të përfshirë në këtë skemë mashtrimi.

Seksioni për Hetimin e Krimeve Ekonomike dhe Financiare, pas kallëzimit nga një shtetas, se i kishin kërkuar një shumë parash me anë të mashtrimit, nëpërmjet një aplikacioni, kanë nisur hetimet me metoda proaktive, në drejtimin e Prokurorisë, për zbardhjen e këtij rasti dhe për identifikimin e shtetasve të përfshirë. Si rezultat i veprimeve hetimore të kryera në kuadër të operacionit policor të koduar “Flop”, u arrestua në flagrancë shtetasi:

1. M., 57 vjeç, banues në Tiranë.

Nga veprimet hetimore dyshohet se shtetasi R. M., në bashkëpunim me një shtetas tjetër të paidentifikuar, kanë përfituar 3 000 000 lekë nga administratori i një subjekti privat, pasi kanë komunikuar me të në aplikacionin “Signal”, në emër të përfaqësuesit të një institucioni vendor.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprën penale “Mashtrimi” me pasoja të rënda, kryer në bashkëpunim.

LEXONI GJITHASHTU:

• Mashtrim, falsifikim e vjedhje, ekstradohen 2 shqiptarë nga Italia dhe 1 nga Zvicra
• Goditet një skemë e madhe mashtrimi me institucionet arsimore, arrestohet 20-vjeçari