Pranohet kërkesa e banorëve për akses në ‘Thumanë-Kashar’, Ministria nuk e konfirmon

Kreu i ‘Demokratëve Euroatlantikë’ dega Krujë, Sabah Sheta, bën me dije se banorët e Krujës dhe Fushë-Krujës kanë realizuar kërkesën e tyre për të pasur hyrje dhe dalje në autostradën Thumanë-Kashar, pas protestave të shumta që kanë zhvilluar.

Përmes një postimi në facebook, Sheta shprehet se pas takimit që pati përfaqësia e qytetarëve të Krujës me zv.kryeministren dhe ministren e Transporteve Belinda Balluku, është pranuar kërkesa e tyre nga qeveria për të patur akses në rrugën Thumanë-Kashar.

Ai më tej shpreh flënderime për secilin banor që iu bashkua protestës, të cilët sipas tij nuk u tërhoqën në asnjë moment derisa fituan dhe pse me vonesë të drejtën që u ishte mohuar.

Nga ana tjetër, banorët e Thumanës, thonë se i kanë lënë Qeverisë 15 ditë afat për të hapur rrugën.

Por ndërkohë Ministria e Infrastrukturës nuk ka njoftuar zyrtarisht për asnjë marrëveshje me banorët apo mënyrën sesi ata do të aksesojnë rrugën. Ditën e nesërme pritet që zv.kryeministrja Belinda Balluku në interpelancen e thirrur për këtë çështje, të japë detaje.

Reagimi i plotë i Sabah Sheta:

E drejta vonon, por triumfon. Qeveria tërhiqet, krutanët do të ketë hyrje dhe dalje në aksin e rruges Thumanë-Kashar

Sot është një ditë e shënuar për banorët e Bashkisë Krujë. E tillë u kthye fal bashkërezistencës me vëllezërit të mi nga Kruja, Fushë -Kruja Nikla, Cudhia, Bubqi dhe Thumana. Pas një takimi që patëm si përfaqësi e qytetarëve të Krujës me zv.kryeministren dhe ministren e Transporteve Belinda Balluku prej saj në emër të qeverisë u pranua kërkesa jonë e drejtë dhe legjitime për të patur akses në rrugën Thumanë-Kashar. U bë e mundur që qeveria shqiptare të tërhiqet nga izolimi që i bënë mijëra bizneseve dhe 85 mijë banorëve të Krujës.

Motra dhe vëllezër krutanë! Kjo nuk është lëmoshë dhe dhuratë për ne. Është një e drejtë e mohuar nga ekzekutivi, por tashmë e fituar dhe pse me vonesë, por që ishin protestat tona sistematike, rezistenca jonë, premtimi që i bëmë njëri-tjetrin për të mos bërë asnjë hap pas, ajo që na mundësoi uljen në tavolinë sot me znj.Balluku, prej së cilës morëm premtimin që qytetarëve të Bashkisë Krujë do tu kthehet ajo që kishin; akesin (hyrje dhe dalje) në rrugën e re Thumanë-Kashar.

Veç falënderimit për secilin që na jeni bashkuar në çdo protestë, kam një mirënjohje për atë çfarë bëtë duke lënë punët tuaja të përditshme për të iu bashkuar kësaj kauze.

Të nderuar vëllezër! Pa ju nuk do ta kishim të mundur të korrnim këtë fitore. Ne e kishim bërë të qartë që nuk do të tërhiqeshim, ata e dëgjuan me zë dhe figurë, e panë përmes akteve tona, ndaj sot ishte ministrja e Transporteve Balluku që “vrau” indiferencën duke i kushtuar vëmendje këtij problemi që për në shkaktonte kosto sociale dhe ekonomike sepse Kruja është dhe një zonë turistike dhe historike.

Duke vlerësuar premtimin dhe vendimin e Ministrisë së Transporteve për t’u tërhequr nga qëndrimi fillestar dhe kokëfortë i tyre dhe dhënien e zgjidhjes, duke iu dhënë qytetarëve të Krujës mundësinë të hynë dhe dalin në aksin e rrugës Thumanë-Kashar, nuk na mbetet gjë tjetër veçse ta përshëndesim këtë qëndrim dhe pse të vonuar, por ndërkohë do ta monitorojmë zbatimin e tij.

Vëllezër edhe njëherë FALEMINDERIT dhe MIRËNJOHJE për secilin! BASHKË ia DOLËM!

LEXONI GJITHASHTU:

• Mbahet protesta e 9-të në Thumanë-Kashar, banorët përplasen me policinë
• Tensione në protestën Thumanë-Kashar, banorët përplasen me policinë