Sfidë delikate për Skënderbeun, korçarët përballen me Laçin

Përballja me Lacin mund të konsiderohet si një duel direkt për Skënderbeun, me të dyja ekipet të cilat qëndrojnë në fundin e tabelës së klasifikimit. Këtë të premte korçarët kanë zhvilluar përgatitjet e fundit, ndërsa atmosfera duket pozitive në prag të ndeshjes me bardhezinjtë, të cilën e luajnë në shtëpi.

Trajneri Ivan Gvozdenoviç e ka vlerësuar maksimalisht kundërshtarin, që deri më tani nuk ka asnjë fitore.

“Mund të them është delikate pasi kemi nevojë për pikë. Edhe java e parë ishte e tillë edhe nesër po njësoj. Presioni është në futboll, stafi, lojtarët, por pa presion nuk ecet përpara. Presioni është pjesë e futbollit, por nuk kemi problem”, deklaroi Gvozdenoviç, trajner i Skënderbeut.

Tekniku serb i korçarëve nuk është aspak i kënaqur me atë çka skuadra ka përfituar deri më tani.

“Nuk shikoj asnjë problem veç me pikët, 5 javë 4 pikë është shumë pak. Kjo është situata, tani nuk do bëjmë shumë analiza, sepse jemi të përqëndruar, do shohim si do dalim e pastaj do flasim”, tha Gvozdenoviç.

Skënderbeu vjen pas humbjes me Dinamon në Elbasan, ndërsa Laci pas një barazimi shpresëdhënës me Partizanin në shtëpi. Superliga shqiptare zhvillon dy përballje të shtunën, Skënderbeu-Laci dhe Partizani-Tirana.

LEXONI GJITHASHTU:

• Tirana kërkon të thyejë “mallkimin” e barazimeve, përballet me Elbasanin
• Humbja e parë e Egnatias| Rrogozhinasit ‘bien’ në Shkodër, Teuta përmbys Skënderbeun