Pas takimit me trupat ushtarake ukrainase, Macron pret në Paris presidentin Zelensky

Presidenti ukrainas Volodymyr Zelenskyy dhe Presidenti francez Emmanuel Macron do të takohen të enjten në Paris “për të riafirmuar vendosmërinë e Francës në mbështetjen e palëkundur për Ukrainën dhe popullin ukrainas”, thuhet në një deklaratë të zyrës së presidentit francez.

Kjo do të jetë vizita e pestë e presidentit ukrainas në Francë që kur filloi sulmi i forcave ruse në Ukrainë, dhe vjen një ditë pasi Presidenti francez Macron vizitoi një njësi ushtarakësh ukrainas që stërviten në Francë.

Franca po përgatit 2,300 ushtarë të brigadës së quajtur “Ana e Kievit”, sipas emrit të princeshës së lindur në Kiev, e cila në vitin 1051 u martua me mbretin francez Henry I.

Një zyrtar i presidencës franceze tha se përgatitja e ushtarëve ukrainas do të përfundojë brenda disa muajsh dhe se është “krejtësisht identike me situatën që do të gjejnë në terren”.

Zyrtari tha se njësitë “do të përballen me situata reale – stres, zhurmë, dronë”, gjatë stërvitjes së tyre.

Franca është zotuar gjithashtu të japë armatime për këtë brigadë.

Ndër ndihmat e premtuara janë 128 automjete të blinduara, 18 sisteme artilerie ‘Ceasar’ dhe 20 njësi raketash antitank.

LEXONI GJITHASHTU:

• Gazeta ukrainase thotë se po përballet me presion nga zyra e Zelenskyt
• Rama merr pjesë në samitin Ukrainë, Europa Juglindore, takohet me Zelenskyn