Rafael Nadal njofton tërheqjen nga tenisi profesionist

Rafael Nadal ka njoftuar zyrtarisht tërheqjen nga tenisi profesionist. Tenisti 38-vjeçar, i cili ka fituar 22 tituj Grand Slam, e bëri publik vendimin e tij përmes një videoje të publikuar në rrjetin “X”.

“Përshëndetje të gjithëve. Jam këtu për t’ju njoftuar se po tërhiqem nga tenisi profesionist.

E vërteta është se këto kanë qenë disa vite të vështira, sidomos dy të fundit. Nuk mendoj se kam qenë në gjendje të luaj pa kufizime.

Është sigurisht një vendim i vështirë, një vendim që më ka marrë kohë për ta marrë.

Por, në këtë jetë, gjithçka ka një fillim dhe një fund.

Dhe mendoj se është koha e duhur për të vënë në fund një karrierë që ka qenë e gjatë dhe shumë më e suksesshme se sa kisha mundur ndonjëherë ta imagjinoj.”

Tenisti ka pasur probleme fizike dhe lëndime të shumta gjatë viteve të fundit.

Nadal pranoi në maj të vitit të kaluar se po shihte fundin e karrierës së tij dhe se shpresonte të ishte në gjendje të luante një turne të fundit në 2024-ën.