Pse dhe dorëheqjen? Çyrbja “kyç gojën” pas daljes nga SPAK, merret nën hetim

Ish-deputeti i Partisë Socialiste, Jurgis Çyrbja, ka lënë ambientet e Prokurorisë së Posaçme pas 30 minutash. Pasi doli nga organi i akuzës, Çyrbja zgjodhi të mos jepte asnjë koment, duke iu thënë gazetarëve që t’i drejtohen prokurorisë nëse duan informacion.

Ish-deputeti socialist shtoi se do të paraqitet në organin hetues sa herë të thirret. Ai u paraqit në SPAK si person nën hetim, i shoqëruar nga avokatja e tij. Duket se prokuroria ka ngritur akuza penale ndaj Jurgys Çyrbjes, pas kallëzimit të Edi Palokës për ushtrim të ndikimit të paligjshëm dhe shpërdorim detyre, gjatë kohës që ai ishte për 4 vite në krye të Kadastrës së Durrësit, përpara se të zgjidhej deputet në vitin 2021.

Mësohet se paraqitja e sotme në SPAK vjen një ditë pasi Çyrbja dorëzoi mandatin e deputetit. Ai refuzoi t’i përgjigjej pyetjes së gazetarëve se përse e la mandatin.

Në një komunikim për Euronews Albania të enjten, Çyrbja shpjegoi se arsyeja e dorëheqjes lidhet me një ndërhyrje kirurgjikale që duhet të bëjë dhe, për shkak të kësaj, ai nuk mund të angazhohet në fushatën elektorale. Çyrbja ka përfaqësuar qarkun e Durrësit, ndërsa zona e tij elektorale ishte Shijaku.

Dorëheqja nga mandati i deputetit mund të jetë edhe një truk i përdorur nga Çyrbja për t’i shpëtuar hetimit të SPAK, pasi ai tashmë nuk është më zyrtar i lartë.

LEXONI GJITHASHTU:

• Deputeti i Partisë Socialiste paraqitet në SPAK, zbardhet arsyeja
• Dorëzon mandatin deputeti i Partisë Socialiste, pak ditë pasi u paraqit në SPAK