“Na tregoni programin”, aktivisti kërkon shpjegim nga Teliti se çfarë ofron PD-ja për rininë

Kandidati i Partisë Demokratike për deputet Dorjan Teliti në emisioni “Rinvote” tha se selia blu ka programe konkrete, për të mbështetur të rinjtë shqiptarë.

Sipas tij, partitë politike serioze duhet të përmbushin tre kushte, të cilat sipas tij i përmbush fare mirë PD-ja, por jo PS-ja.

“Partitë politike kur janë serioze, duhet të plotësojnë tre kushte: Të ketë lider, ekip dhe program. Sa i përket liderëve, besojmë se ndryshimin është shumë i qartë. Kemi kryeministrin aktual, i cili kishte tetë vite në dispozicion dhe nuk kanë një rekord pozitiv. Të rinjtë nuk gjejnë punë, s’ka alternativë punësimi, të gjithë kanë marrë emigracionin. Lideri i opozitës ka një vizion evropian, kurse kryeministri thellon retorikën agresive”, tha ai.

Aktivisti Dosti Banushi i kërkoi sqarime konkrete kandidatit të selisë blu për programin  ndaj të rinjve, kurse z. Teliti u shpreh si vijon:

“Programin ne e kemi. Ne kemi plan pune të kostuar. Kemi prezantuar me dhjetëra kapituj të programit tonë, ndërsa nga na tjetër kemi një forcë politike, e cila nuk na thotë asgjë tjetër. Ne do t’i arrijmë me forcë, me mund. Stazhe pune 1-vjeçare për studentët. Nuk do paguhet nga sipërmarrja, por nga arka jonë e përbashkët. Ju do punësoheni, këtë zotohemi ne”” tha ai.

Ai sqaroi po ashtu edhe planet ekonomike të PD, ku sipas Telitit e gjitha do të bazohet tek gara e ndershme.

“Ne jemi parti e qendrës së djathë, jemi pro konkurrencës dhe rregullave të barabarta, por nga ana tjetër kemi dhe plagë sociale të mëdha në vend. Plani ynë i punës është i matshëm, është bazuar në gërshetim të këtyre nevojave. Duke u ulur taksat, të kenë sa më të thjeshtë se si të zhvillojnë bizneset, kemi aspektin social, studentët dhe rininë”, tha ai.