Mike Tyson i ngadaltë dhe i plakur, mposhtet në ring nga youtuber-i i njohur

Youtuber-i Jake Paul, arriti të triumfonte në ndeshjen e boksit ndaj Mike Tyson në një përballje që ngjalli polemika dhe kritika. Përballja e mbajtur në Teksas, përpara 70,000 tifozëve dhe miliona shikuesve në Netflix, përfundoi me një fitore me pikë për Paul-in, i cili mposhti ish-kampionin e dyfishtë të peshave të rënda, 58-vjeçarin Mike Tyson.

Tyson, që nuk kishte garuar në një ndeshje profesionale për gati 19 vjet, u duk larg formës së tij të dikurshme. Jake Paul, në moshën 27-vjeçare dhe me vetëm pak vite përvojë në boks, përfitoi nga mosha she shkathtësia e tij për ta mbajtur Tyson-in në distancë, duke e dominuar ndeshjen me grushte precize dhe lëvizje të kujdesshme.

Ndeshja u zhvillua në tetë raunde nga dy minuta secili, dhe Tyson tregoi qartë shenja lodhjeje dhe ngadalësie.

Rezultatet e gjyqtarëve, 80-72, 79-73 dhe 79-73, të gjitha në favor të Paul-it, lanë tifozët e Tyson-it të zhgënjyer. Shumë nga ata që kishin ardhur për të parë legjendën, filluan të largoheshin përpara se të shpalleshin rezultatet, duke humbur besimin te idhulli i tyre. Pas humbjes së tij të shtatë në karrierën e tij të gjatë prej 57 ndeshjesh, Tyson sugjeroi një përballje të ardhshme me vëllain e Jake Paul-it, Logan Paul.

Ndeshja u kritikua për legjitimitetin e saj, pavarësisht se u sanksionua si një ndeshje profesionale nga komisioni i Teksasit. Përballja u zhvillua me doreza më të rënda dhe me mbushje të shtuar, por nuk pati asnjë goditje afër një nokauti. Paul realizoi 78 grushte gjatë gjithë ndeshjes, ndërsa Tyson arriti vetëm 18. Shumë kritikë e konsideruan këtë përballje si një tallje për boksin profesionist.

Jake Paul, i cili u bë i famshëm përmes platformave të mediave sociale, arriti fitoren e tij të 11-të në karrierën profesionale. Ai e bëri të qartë pas ndeshjes se synon një përballje me yllin meksikan të boksit, Saul ‘Canelo’ Alvarez. “Ai e di ku janë paratë, dhe e di që do një pagesë të madhe,” tha Paul, duke i dërguar një sfidë të hapur kampionit të njohur.

Ndeshja u transmetua në shtrirjen globale të Netflix prej 283 milionë abonentësh në mbarë botën.

Jake Paul fitoi 30 milionë £ ndërsa Tyson gjysmën e tyre.

LEXONI GJITHASHTU:

• Usyk shpallet kampion botëror i boksit pas garës me Tyson Fury
• VIDEO| Mike Tyson rikthehet në ring, qëllon me shpullë kundërshtarin gjatë peshimit