Reporterët pa kufij: Gazetaria në Shqipëri është problematike

Organizata për lirinë e medias ‘Reporterët pa Kufij’ (RSF), në raportin e fundit të publikuar ka theksuar se gazetaria në Shqipëri është problematike.

Për të sjellë këtë raport, organizata është bazuar te të dhënat e Indeksit Botëror të Lirisë së Shtypit për vitin 2021.

Në raport është theksuar se pandemia Covid-19 është përdorur për të bllokuar qasjen e gazetarëve në burimet e informacionit dhe raportimin në terren. Gjithashtu është shkruar se gazetaria, vaksina kundër keqinformimeve, është bllokuar në më shumë se në 130 shtete. Raporti vëren se vetëm në 7% nga 180 vende të marra në shqyrtim, gazetaria është e lirë dhe e vërtetë.

Edhe rasti i Shqipërisë dhe i vendeve fqinje është përmendur në raport, ku vihet re që klasifikohen si vende problematike.
Shqipëria rezulton si vend ku gazetaria nuk është e besueshme, dhe renditet në vendin e 83-të në klasifikim, por gjithsesi nga vjet ka përmirësim me një vend, nga 84 vitin e shkuar.

Nga ana tjetër Kosova është më mirë në renditje sesa Shqipëria, duke u renditur në vendin e 78-të, por një vit më parë klasifikohej tetë vende më mirë.

Kurse në rastin e Maqedonisë së Veriut, shihet progres, duke u ngjitur me dy vende në klasifikim, nga 92 vjet, në 90 për këtë vit. Ndërkohë vendet fqinje të rajonit janë po ashtu  të klasifikuara si vende ku gazetaria është problematike.