Australia çon përpara ligjin që iu ndalon fëmijëve rrjetet sociale

Dhoma e Përfaqësuesve në Australi miratoi të mërkurën një projektligj që do të ndalonte fëmijët deri në moshën 16 vjeçare të përdorin rrjetet sociale. Tani, finalizimi i këtij ligji, të paprecedentë në botë, është në dorën e Senatit të Australisë.

Partitë kryesore mbështetën projektligjin që parasheh gjoba deri në 50 milionë dollarë australianë për platformat si TikTok, Facebook, Snapchat, Reddit, X dhe Instagram, për dështime sistematike në parandalimin e hapjes së llogarive nga fëmijët.

Ligji u miratua me 102 vota pro dhe 13 kundër. Nëse projektligji bëhet ligj këtë javë, platformat do të kenë një vit kohë për t’i zbatuar kufizimet e moshës përpara se të fillojnë ndëshkimet.

Deputeti i opozitës, Dan Tehan, tha se Qeveria kishte rënë dakord të pranonte ndryshimet në Senat që do të përforcojnë mbrojtjen e privatësisë. Platformat nuk do të lejohen të detyrojnë përdoruesit të japin dokumente identifikimi të lëshuara nga qeveria, përfshirë pasaportat ose patentat, dhe as të kërkojnë identifikim dixhital përmes një sistemi qeveritar.

“A do të jetë e përkryer? Jo. Por, a është ndonjë ligj i përkryer? Jo, nuk është. Por, nëse ndihmon, edhe nëse ndihmon në mënyrën më të vogël, do të bëjë një ndryshim të madh në jetët e njerëzve”, tha Tehan në Parlament.

LEXONI GJITHASHTU:

• Australia prezanton ligjin që ndalon fëmijët nën 16 vjeç nga rrjetet sociale
• Australia planifikon të ndalojë fëmijëve që përdorin rrjetet sociale