Osmani takon presidentin e ri të KE-së, diskutohen “dëshmitë për lidhjet e Serbisë”

Presidentja e Kosovës, Vjosa Osmani, tha se ia ka prezantuar presidentit të ri të Këshillit Evropian, Antonio Costa, “dëshmitë për lidhjet e Serbisë” me sulmin e 29 nëntorit në Zubin Potok dhe të sulmit të armatosur që ndodhi vitin e kaluar në Zveçan.

Osmani u takua me zyrtarin e lartë evropian në Bruksel dhe i tha atij se sulmi në kanalin e ujit të Ibër-Lepencit në Varragë të Zubin Potokut, “kishte për qëllim që të linte një pjesë të madhe të qytetarëve të Kosovës pa ujë, pa energji elektrike, pa ngrohje dhe me pengesa në sistemin e telekomunikimit”.

Osmani foli edhe për Millan Radoiçiqin, i cili ka marrë përgjegjësinë për sulmin e armatosur në Banjskë të Zveçanit më 24 shtator 2023.

Sipas Osmanit, ai është personi që po zbaton “urdhrat e Beogradit zyrtar për sulme ndaj Kosovës”, duke thënë se ai vazhdon të jetë i lirë “dhe kjo dëshmon mungesën e gatishmërisë së Serbisë për përgjegjësi dhe llogaridhënie për aktet e agresionit ndaj Kosovës”.

Në takimin me Costa-n, Osmani kërkoi bashkëpunim me faktorin ndërkombëtar për hetimin e sulmit në Varragë të Zubin Potokut.

Është shumë me rëndësi, që përveç hetimit, puna jonë e përbashkët të fokusohet edhe në parandalimin e sulmeve të reja”, tha Presidentja.

Osmani dhe Costa po ashtu kanë folur edhe për rrugën e Kosovës drejt Bashkimit Evropian. Presidentja Osmani ka kërkuar mbështetje për aplikimin e Kosovës që të marrë statusin e vendit kandidat dhe heqjen e masave kufizuese të BE-së ndaj Kosovës.

LEXONI GJITHASHTU:

• Vjosa Osmani bisedon me O’Brien dhe Lammy për sulmin në Zubin Potok
• Një vit nga Banjska, Vjosa Osmani kujton rreshterin e vrarë nga sulmi