Incident në Londër: Makina merr përpara njerëzit në trotuar, disa të plagosur

Një burrë është arrestuar në Londër nën dyshimet për tentativë vrasje, pas një incidenti të ndodhur në orët e para të ditës së Krishtlindjes, ku me makinën e tij u fut në një trotuar të populluar me njerëz.

Si pasojë e incidentit katër persona u dërguan me urgjencë në spital, ndërsa njëri prej tyre raportohet të jetë në gjendje të rrezikshme për jetën.

Policia ka njoftuar se ngjarja është e izoluar dhe nuk ka lidhje me aktet terroriste. Një kordon sigurie është vendosur jashtë Teatrit Sondheim, i njohur për shfaqjen e muzikalit Les Miserables, ndërsa autoritetet kanë siguruar vendin e ngjarjes për të hetuar rastin. Në vendngjarje janë gjetur disa objekte, përfshirë njolla gjaku, një xhaketë, një palë këpucë dhe një kapele.

Zëvendës Ndihmës Komisioneri Stuart Cundy ka deklaruar se forcat e policisë reaguan menjëherë dhe arrestuan të dyshuarin “brenda pak minutash”. Ai shtoi se, sipas hetimeve paraprake, i dyshuari ka qenë i përfshirë në një grindje në një klub nate përpara se të hipte në makinën e tij dhe të ngjitej në trotuar. Policia po i bën thirrje çdo personi që mund të ketë informacion lidhur me ngjarjen, të kontaktojë autoritetet.

LEXONI GJITHASHTU:

• Pamje të rënda nga sulmi në Gjermani, momenti kur makina futet mes turmës
• Disa të vdekur dhe 80 të plagosur, arrestohet autori i sulmit terrorist në Gjermani