Dera e muzeut shpërthehet me eksploziv, vidhen përkrenare ari e byzylykë mbretërorë

Një ngjarje e paprecedentë tronditi muzeun Drents në Assen, Holandë, të premten në mëngjes, kur disa hajdutë përdorën eksploziv për të hyrë dhe për të vjedhur disa artefakte të jashtëzakonshme arkeologjike nga një ekspozitë që shpaloste thesaret e Dacianëve, një popull i lashtë që ka banuar në rajonin që përfshin Rumaninë dhe Moldavinë e sotme.

Sipas zyrtarëve të muzeut, grabitësit morën disa prej objekteve më të çmuara të ekspozitës, duke përfshirë një përkrenare ari dhe tre byzylykë mbretërorë dakë, që ishin pjesë qendrore e shfaqjes “Dacia – Perandoria e Arit dhe Argjendit”.

Shpërthimi ndodhi rreth orës 3:45 të mëngjesit, sipas raportimeve të policisë, dhe dëmet në muze ishin të konsiderueshme.

Grabitësit përdorën eksploziv për të hapur forcërisht një derë hyrëse dhe më pas arritën të arratiseshin me thesaret e vjedhura.

Dëmtime të tjera u shkaktuan gjatë grabitjes, duke përfshirë thyerjen e disa vitrinave që mbushnin sallat e ekspozitës.

Objektet e vjedhura, që datojnë nga periudha e lashtë e Dacianëve, ishin huazuar nga të paktën 15 muzeume rumune për të pasuruar këtë ekspozitë të veçantë, e cila ishte planifikuar të shpaloste trashëgiminë kulturore dhe historinë e këtij populli të lashtë.

Drejtori i Muzeut Drents, Harry Tupan, u shpreh i tronditur nga ky akt tërësisht i papranueshëm.

“Kjo është një ditë tepër e errët dhe ne jemi thellësisht të tronditur,” tha ai. “Ne jemi thellësisht të pikëlluar që thesaret e kolegëve tanë rumunë janë vjedhur. Kjo nuk ka të bëjë vetëm me arin, por me trashëgiminë kulturore. Ai tha se ky ishte incidenti më i madh në historinë e tij 170-vjeçare”.

Rreth orës 4:15 të mëngjesit një makinë e dyshuar se u përdor nga autorët mori flakë. Policia dyshon se kjo mund të jetë pjesë e një operacioni të mirëplanifikuar të grabitjes, ndërsa një automjet tjetër u pa duke ikur nga vendi i ngjarjes. Sipas raportimeve, asnjë person nuk ka mbetur i lënduar dhe ende nuk ka arrestime.

Një hetim i thelluar ka filluar, dhe autoritetet janë në kërkim të ndihmës nga banorët dhe dëshmitarët që mund të kenë parë diçka të dyshimtë në zonë. Policia ka kërkuar që çdo kamerë e mundshme e sigurisë, përfshirë ato të ziles së derës, të mund të ndihmojë në identifikimin e personave të përfshirë në këtë ngjarje.

Kjo vjedhje e kryeveprave të Dacianëve është një goditje e rëndë për kulturën dhe historinë e Rumanisë dhe për komunitetin ndërkombëtar të muzeve dhe arkeologëve. Muzeu Drents, i njohur për pasurinë e tij arkeologjike dhe për ekspozitat e veçanta, është i njohur si një nga muzeumet më të rëndësishme të Holandës dhe ngjarja ka shkaktuar një pasiguri të madhe në mesin e profesionistëve të artit dhe muzeve.

LEXONI GJITHASHTU:

• Holanda u ofron 900 euro sirianëve që të kthehen vullnetarisht në vendin e tyre
• Arrestohet francezi në Holandë, po transportonte kokainë të fshehur në arkivole