Raporti i CIA: COVID mund të ketë ardhur nga një laborator në Kinë

Një raport i CIA hedh dyshime se pandemia e COVID-19 e ka zanafillën nga laboratori i Vuhan në Kinë.

CIA tani beson se pandemia e COVID-19 “me shumë gjasë” ka origjinën nga një laborator në Kinë sesa nga transmetimi nga kafshët. Ky konkluzion i ri vjen pas publikimit të një analize të re, e cila u hartua nën administratën Biden me kërkesë të ish-drejtorit të CIA-s, William Burns.

Për vite me radhë, CIA ka deklaruar se nuk është e qartë nëse COVID-19 ishte rezultat i një incidenti në laborator apo kishte një origjinë natyrore. Vlerësimi i saj më i fundit vë gishtin te Kina, megjithëse pranon se ka “besim të ulët” në këtë përfundim. Në analizën e saj, CIA thotë se dy skenarët- rrjedhja laboratorike dhe origjina natyrore- mbeten të mundshme.

Gjetjet nuk bazohen në prova të reja, por në analizën e shërbimit inteligjent lidhur me përhapjen e virusit. “CIA vazhdon të vlerësojë se të dyja skenarët, lidhur me kërkimin shkencor dhe me origjinën natyrore, të pandemisë COVID-19 mbeten të mundshme,” tha agjencia në një deklaratë.

Raporti u deklasifikua dhe u publikua të shtunën pas zgjedhjes së kreut të ri të agjencisë John Ratcliffe, i cili u propozua për këtë post nga presidenti Donald Trump. Drejtori i ri tha se një nga prioritetet e tij të para ishte që agjencia të bënte një vlerësim publik mbi origjinën e pandemisë. Vet kreu i ri i CIA ka deklaruar disa herë se me të dhënat që kishte, ishte i mendimit se origjina e virusit ishte një laborator në Kinë dhe jo një proces natyror.

Raporte të mëparshme mbi origjinën e koronavirusit ishin të ndara mbi atë, nëse ai kishte dalë nga një laborator kinez, ndoshta aksidentalisht, apo kishte lindur në mënyrë natyrale.

LEXONI GJITHASHTU:

• Studimi: Covid-i ka efekte të dëmshme afatgjata në sistemin kardiovaskular
• “Anglia do pushtonte Holandën”, Johnson: Do merrnim 5 mln vaksina anti-COVID