Kallas: Nëse SHBA dhe BE fillojnë një luftë tregtare, Kina do kënaqet nga ana tjetër

Përfaqësuesja e Lartë e BE-së për Politikën e Jashtme dhe Sigurinë, Kaia Kallas tha sot se nëse SHBA-ja fillon një luftë tregtare me BE-në, Kina do të jetë ajo që do të dalë e kënaqur nga gjithë kjo situatë.

Lidhur me njoftimin e presidentit amerikan Donald Trump se SHBA do të vendosë së shpejti tarifa për mallrat e importuara nga BE, Kallas theksoi se nuk ka fitues në luftërat tregtare.

“Nëse SHBA fillon një luftë tregtare, atëherë Kina është ajo që qeshë mënjanë. Ne jemi shumë të ndërlidhur. Ne kemi nevojë për Amerikën dhe Amerika ka nevojë për ne. Tarifat rrisin kostot. Ato nuk janë të mira për punë, nuk janë të mira për klientët. Kjo është e qartë”, u tha Kallas gazetarëve pas mbërritjes në një takim jozyrtar të liderëve të BE-së për mbrojtjen evropiane.

Ajo shtoi se mbrojtja evropiane është e lidhur ngushtë me NATO-n dhe vlerësoi se nevojitet një bashkëpunim më i fortë i BE-së me NATO-n, si dhe se marrëdhëniet me SHBA-në dhe Britaninë e Madhe janë “jashtëzakonisht të rëndësishme” për forcimin e mbrojtjes evropiane .

Presidenti amerikan Donald Trump njoftoi më herët sot se së shpejti do të vendosë tarifa për mallrat e importuara në SHBA nga Bashkimi Evropian dhe nuk e përjashtoi një masë të tillë kundër Britanisë së Madhe.

LEXONI GJITHASHTU:

• Netanjahu takim me Trump, kryeministri izraelit: Vizita, dëshmi e aleancës tonë
• Trump vendosi tarifa, kundërpërgjigjen Kanadaja dhe Meksika