Ukraina| Gjermania i përgjigjet SHBA-së: S’e mbështesim paqen e diktuar nga Putin

Kancelari gjerman, Olaf Scholz, deklaroi këtë të shtunë, në Konferencën e Sigurisë në Mynih se lufta midis Ukrainës dhe Rusisë mund të përfundojë vetëm nëse sigurohet sovraniteti i Ukrainës. Ai theksoi se një paqe e diktuar nga Rusia nuk do të ketë mbështetjen e Gjermanisë apo partnerëve evropianë.

Duke folur para liderëve evropianë dhe politikëbërësve, Scholz u shpreh se për të garantuar një paqe të qëndrueshme, Ukraina duhet të ketë një ushtri të fortë dhe mbështetja ndërkombëtare duhet të vazhdojë. Ai shtoi se Europa duhet të ndërtojë një industri të fortë të mbrojtjes, por gjithashtu do të vazhdojë të blejë pajisje ushtarake nga SHBA, duke mos u shkëputur nga bashkëpunimi transatlantik.

Në lidhje me shpenzimet për mbrojtjen, Scholz parashikoi se qeveria e ardhshme e Gjermanisë do të krijojë një përjashtim nga kufiri kushtetues i borxhit për të garantuar financimin e mbrojtjes dhe sigurisë kombëtare.

Gjatë fjalës së tij, kancelari gjerman iu kundërpërgjigj kritikave të nënpresidentit amerikan JD Vance, i cili i akuzoi liderët evropianë për kufizimin e lirisë së fjalës. Scholz theksoi se demokracia gjermane është e fortë dhe se ekstremi i djathtë nuk do të lejohet të ketë ndikim në vendimmarrjen politike. Ai mbrojti ligjet gjermane që ndalojnë gjuhën e urrejtjes, duke theksuar se fjala e lirë nuk përfshin sulme të paligjshme ndaj të tjerëve.

Komentet e Scholz vijnë në një moment kur marrëdhëniet transatlantike janë në një fazë të tensionuar, me ndryshime të rëndësishme në politikën amerikane ndaj Evropës dhe Ukrainës.

LEXONI GJITHASHTU:

• “Ka ardhur sherif i ri në qytet”- Vance shokon liderët evropianë në Mynihh
• Von der Leyen paralajmron Trump: Dështimi në Ukrainë dobëson BE-në dhe SHBA-të
• “Jeni tërbuar” Medvedev sulmon Evropën pas bisedës Trump-Putin: Koha juaj ka mbaruar