Përmirësohet gjendja shëndetësore e Papa Françeskut

Shëndeti i Papës ka treguar një “përmirësim të lehtë” në ditën e tij të gjashtë në spital, tha Vatikani. Papa Françesku, 88 vjeç, u shtrua në spitalin Gemelli të Romës javën e kaluar me një infeksion të frymëmarrjes. Ai është diagnostikuar me pneumoni në të dy mushkëritë.

Të mërkurën, ai u vizitua nga kryeministrja e Italisë, Georgia Meloni, e cila tha se ishte “shumë e lumtur që e gjeti atë vigjilent dhe të përgjegjshëm. Bëmë shaka si gjithmonë. Ai nuk e ka humbur sensin e tij proverbial të humorit”. Ajo i uroi atij një shërim të shpejtë, në emër të qeverisë italiane dhe të gjithë vendit.

“Testet e gjakut, të vlerësuara nga stafi mjekësor, tregojnë një përmirësim të lehtë, veçanërisht në indekset inflamatore,” tha Vatikani në një deklaratë më vonë të mërkurën. Më herët gjatë javës, Vatikani tha se testet mjekësore dhe një radiografi e gjoksit treguan “një pamje komplekse”.

Pneumonia është një infeksion serioz që mund të inflamojë dhe dëmtojë mushkëritë, duke shkaktuar dhimbje gjoksi dhe duke e vështirësuar frymëmarrjen. Vatikani tha në përditësimin e tij të fundit mbi shëndetin e brishtë të Papës se ai ishte vigjilent dhe hëngri mëngjes.

Një zyrtar i Vatikanit tha se Papa ishte ende në gjendje të ngrihej nga shtrati dhe të ulej në një kolltuk në dhomën e tij të spitalit dhe ai po vazhdonte të bënte disa punë. Ai ka anuluar një audiencë papale të planifikuar për të shtunën dhe nuk është mjaftueshëm mirë për të marrë pjesë në meshën të dielën.

LEXONI GJITHASHTU:

• Vatikani tregon sëmundjen nga e cila po vuan Papa
• Papa Françesku shtrohet në spital