“Kartat i ka Putin”- Trump flet për marrëveshjen e paqes në Ukrainë

Presidenti amerikan, Donald Trump, deklaroi se Rusia ka një avantazh në negociatat e paqes për Ukrainën, duke argumentuar se Moska ka marrë “shumë territor” që nga fillimi i pushtimit në shkallë të plotë.

Në një intervistë për BBC, Trump u shpreh se beson vërtetë se Rusia dëshiron t’i japë fund luftës.

“Mendoj se ata duan të shohin fundin e luftës. Ata i kanë kartat, sepse kanë marrë shumë territor,” tha Trump.

Deklaratat e tij vijnë pas kritikave të ashpra ndaj presidentit ukrainas, Volodymyr Zelensky, të cilin e quajti “diktator” në një konferencë të dhënë më herët në Florida. Etiketimet ndaj Zelenskyt Trump i përsëriti edhe në një postim në rrjetin e tij social, “Truth Social”.

Kritikat e Trump u nxitën nga dekalrata e Zelenskyt i cili tha se presidenti amerikan “po jeton mes dezinformimit” të shpërndarë nga Moska.

Në Florida, Trump gjithashtu vuri në dyshim legjitimitetin demokratik të Zelensky-t, duke përmendur mungesën e zgjedhjeve në Ukrainë dhe duke pretenduar se ai kishte një mbështetje të ulët publike. Megjithatë, sipas një sondazhi të fundit të BBC Verify, 57% e ukrainasve shprehin besim ndaj presidentit të tyre.

Komentet e Trump kanë shkaktuar reagime të ashpra në skenën ndërkombëtare. Kancelari gjerman, Olaf Scholz, i cilësoi deklaratat e tij si “të gabuara dhe të rrezikshme”, ndërsa kryeministri britanik, Sir Keir Starmer, konfirmoi mbështetjen e tij për Zelensky-n në një bisedë telefonike me të.

Ndërkohë, bisedimet mes zyrtarëve amerikanë dhe rusë, të martën, shënuan kontaktin e parë të nivelit të lartë mes dy vendeve që nga fillimi i luftës.

Në një tjetër deklaratë, Trump la të kuptohet se Ukraina duhet të kishte arritur një marrëveshje për të shmangur konfliktin. “Nuk duhej ta kishe nisur kurrë atë luftë. Mund të kishte bërë marrëveshje,” tha ai.

LEXONI GJITHASHTU:

• Trump kundër Zelenskyt: Cili është plani i tij për luftën në Ukrainë
• Trump për Zelenskyn: Një komedian bindi SHBA të shpenzonte 350 mld për një luftë…