Trupa të dekompozuar e mumifikuar/Vdekja e dyshimtë e aktorit të Hollywood dhe gruas

Aktori fitues i çmimit Oscar, Gene Hackman dhe gruaja e tij dukej se kishin vdekur prej një kohë të gjatë, kur çifti dhe qeni i tyre u gjetën të mërkurën pasdite në shtëpinë e tyre në shtetin amerikan të New Mexico, thotë policia.

Hackman, 95 vjeç, u zbulua në një dhomë anësore pranë kuzhinës së shtëpisë në Santa Fe, ndërsa gruaja e tij Betsy Arakawa, një pianiste klasike 65-vjeçare, u gjet në një banjë, shkruan BBC.

Autoritetet nuk raportuan shenja lëndimi, por i konsideruan vdekjet “mjaft të dyshimta” për t’u hetuar. Ende nuk është dhënë asnjë shkak për vdekjen e çiftit.

Në një karrierë të gjerë, Hackman fitoi dy çmime Oscar dhe shumë çmime tjera kinematografike.

Zyra e Sherifit të Qarkut Santa Fe konfirmoi vdekjen.

“Më 26 shkurt 2025, rreth orës 13:45, zëvendësit e Sherifit të Qarkut Santa Fe u dërguan në një adresë në Old Sunset Trail në Hyde Park ku Gene Hackman, gruaja e tij Betsy Arakawa dhe një qen u gjetën të vdekur”, tha zyra.

Në një konferencë shtypi të enjten pasdite, Sherifi Adan Mendoza tha: “Duket sikur ata kishin vdekur për një kohë të gjatë dhe nuk dua të hamendësoj në lidhje me sa kohë ishte”.

“Ky është një hetim, kështu që ne po mbajmë gjithçka në tryezë”, tha ai.

Një detektiv i cili kishte mbërritur i pari në vendngjarje tha se besonin se çifti kishte vdekur prej disa kohësh për shkak të “dekompozimit” dhe “mumifikimit” të zonjës Arakawa në duar dhe këmbë.

Pranë kokës së zonjës Arakaëa ishte një ngrohës portativ, për të cilin detektivi përcaktoi se mund të ishte rrëzuar në rast se ajo kishte rënë papritur në tokë.

Autoritetet thonë se kanë kërkuar monoksid karboni dhe teste toksikologjike si për Hackman ashtu edhe për gruan e tij dhe se shkaku i vdekjes nuk është përcaktuar ende teksa presin rezultatet e autopsisë.

Një shishe me pilula të shpërndara ishin në banakun e banjës afër trupit të saj. Qeni gjerman Shepherd i çiftit u gjet i ngordhur në një dollap banje pranë zonjës Arakawa.

Hackman u zbulua i veshur me tuta gri, një bluzë blu me mëngë të gjata dhe pantofla ngjyrë kafe. Pranë trupit ishin syze dielli dhe një bastun në këmbë. Detektivi dyshoi se aktori kishte rënë papritur.

Rrethanat e vdekjes së tyre ishin “mjaft të dyshimta në natyrë dhe kërkojnë një hetim të plotë”, thuhej në urdhrin e kontrollit, sepse personi që thirri shërbimet e urgjencës gjeti derën e përparme të pronës të hapur.

LEXONI GJITHASHTU:

• Kush është aktori legjendar amerikan që u gjet i vdekur bashkë me bashkëshorten
• Aktori i Hollivudit dhe gruaja e tij gjenden të vdekur në banesë