Shpërndante lëndë narkotike në zona të ndryshme të Vlorës, arrestohet 45-vjeçari

Specialistët për Hetimin e Narkotikëve në DVP Vlorë, në bashkëpunim me Prokurorinë Vlorë, pas një hetimi 3-mujor, kanë vënë në pranga një 45-vjeçar me iniciale A. B., për veprimtarinë kriminale të shpërndarjes së lëndëve narkotike.

Gjykata e Shkallës së Parë Vlorë caktoi masën e sigurisë “Arrest në burg”, për veprën penale “Prodhimi dhe shitja e lëndëve narkotike” ndaj 45-vjeçarit, banues në Vlorë.

Gjatë hetimeve, policia konstatoi lëndën narkotike kokainë të cilën autori e shpërndante në zona të ndryshme të qytetit të Vlorës.

Nga kjo veprimtari kriminale, 45-vjeçari ka përfituar shuma të konsiderueshme parash, të cilat dyshohet se i ka gjeneruar nga shitja e dozave të kokainës.

Gjithashtu, gjatë operacionit, shërbimet e Policisë kryen kontroll në banesën e tij, ku gjetën dhe sekuestruan: 222 doza kokainë, 1 peshore elektronike, e përdorur për ndarjen e dozave, 2 aparate celularë, dhe 1 automjet.

Në bashkëpunim me Prokurorinë, vijojnë hetimet për dokumentimin e plotë të kësaj veprimtarie kriminale dhe identifikimin e personave të tjerë të përfshirë.

LEXONI GJITHASHTU:

• Ushtarakë serbë do të marrin pjesë në paradën e Moskës, Vulin: Kemi luftuar bashkë
• Ambulanca përmbyset në mes të rrugës, aksident i rëndë në Tiranë