Marrëveshja trepalëshe ushtarake, reagon ministri i Mbrojtjes, Pirro Vengu

Ministri i Mbrojtjes, Pirro Vengu, ka bërë një reagim në X lidhur me marrëveshjen ndërmjet Shqipërisë, Kroacisë dhe Kosovës.

Ministri shprehet kjo marrëveshje ka si qëllim rritjen e sigurisë në rajon si dhe rritjen e kapaciteteve mbrojtëse.

Reagimi i plotë i Ministrit të Mbrojtjes, Pirro Vengu:

“Marrëveshja për mbrojtje dhe siguri mes Shqipërisë, Kosovës dhe Kroacisë është një bashkëpunim i natyrshëm mes tre shtetesh sovrane.

Si aleatë kemi një vlerësim të njëmendtë mbi kërcënimet që synojnë të pengojnë të ardhmen evropiane të rajonit tonë.

Ndaj kemi vendosur të bashkëpunojmë për të rritur kapacitetet tona mbrojtëse dhe për të mbështetur integrimin e Kosovës në mekanizmat rajonalë.

Serbia, duke ndjekur prej dy vitesh një politikë të karrikes boshe në iniciativat rajonale, ia ka pezulluar në mënyrë të njëanshme vetes mundësinë për të nxitur ose për të marrë pjesë në konsultime shumëpalëshe. Ky pezullim, që është në dorën e Serbisë të lihet mënjanë, e bën të kotë çdo narrativë viktimizuese që vjen nga qeveria serbe.

Në historinë e saj, Shqipëria nuk ka precedente marrëveshjesh ose traktatesh të fshehta në dem të fqinjeve, siç e kanë pasur shtete të tjera.

Për rrjedhojë, krahas kureshtjes së ekspertëve të dramave rajonale dhe atyre që mezi presin të gjejnë një vesh për të dëgjuar rënkime, nuk e kemi aspak problem të publikojmë marrëveshjen tripaleshe”.

LEXONI GJITHASHTU:

• Bashkëpunimi ushtarak, ja deklarata që nënshkroi Kosova, Shqipëria e Kroacia
• Trajneri i Anglisë vlerëson Shqipërinë: Një fitore e vështirë, por e rëndësishme