Përfshihet nga flakët banesa në Romë, plagoset rëndë turisti britanik

Një turist britanik ka mbetur i plagosur rëndë pas një shpërthimi të dyshuar gazi, i cili shkatërroi një B&B trekatëshe në Romë. Grant Paterson, 54 vjeç, nga East Kilbride në South Lanarkshire, u djeg rëndë gjatë shpërthimit që ndodhi të dielën në mëngjes në zonën Monteverde të qytetit italian.

Paterson u nxorr nga rrënojat nga zjarrfikësit dhe aktualisht është duke u trajtuar në spitalin Sant’Eugenio. Ai ka pësuar djegie të shkallës së tretë në të paktën 70% të trupit të tij dhe gjendja e tij është kritike.

Zyra e Jashtme, Commonwealth dhe Zhvillim (FCDO) ka njoftuar se është në kontakt me autoritetet lokale për t’u informuar mbi zhvillimet. Paterson, i cili kishte mbërritur në Romë më 17 mars, kishte planifikuar të kthehej në shtëpi të hënën. Postimet e tij në mediat sociale tregojnë se ai kishte vizituar disa nga pikat më të famshme turistike të qytetit, si Koloseu dhe Panteoni, para se të ndodhte ky incident tragjik.

Në një postim para shpërthimit, ai kishte shkruar: “Akomodimi është i bukur. Kjo duhet të jetë një javë e mirë… nëse nuk vritem në një mënyrë të papritur.”

Kryetari i bashkisë së Romës, Roberto Gualtieri, vizitoi vendin e ngjarjes dhe bëri një deklaratë për gazetarët, duke thënë se ishte urdhëruar një hetim i plotë mbi shpërthimin. Ai theksoi se, megjithëse nuk kishte viktima, një person kishte pësuar plagë të rënda. “Me shumë mundësi ai është mysafir i një objekti mikpritjeje, me origjinë skoceze,” shtoi ai.

Sipas autoriteteve, shpërthimi ishte shumë i fuqishëm dhe ka shkaktuar shembjen e një ndërtese, ndërsa muri i Villa Pamphili është dëmtuar gjithashtu. Hetimet për të përcaktuar shkakun e shpërthimit vazhdojnë.

LEXONI GJITHASHTU:

• Foto/ Traktori përmbyset në kanal, i riu shqiptar humb jetën në Itali
• Kremlin: SHBA-ja dhe Rusia janë të gatshme të lëvizin drejt paqes