FBI nis hetimet për “aktivitet të dhunshëm” drejtuar Teslës 

Drejtori i Byrosë Federale të Hetimeve të SHBA-së (FBI), Kash Patel, tha se një hetim është duke u nisur për “një rritje të aktivitetit të dhunshëm drejtuar Teslës”.

“FBI ka hetuar aktivitetin e dhunshëm kundër Teslës. Gjatë ditëve të fundit, ne kemi ndërmarrë veprime shtesë në lidhje me këto incidente. Ky është terrorizëm i brendshëm. Ata që janë përgjegjës do të kapen dhe do të sillen para drejtësisë”, tha Patel, sipas Reuters.

Të premten, presidenti i Shteteve të Bashkuara, Donald Trump, dënoi sulmin në një parking të shitjeve të Tesla-s në Las Vegas, duke thënë se autorët kishin një “shans shumë të mirë për të përfunduar në burg për 20 vjet”.

Policia e Las Vegas më pas njoftoi se sulmuesi vuri flakën disa makinave Tesla duke përdorur kokteje molotov dhe qëlloi tre të shtëna në automjetet e ekspozuara në parkingun e shitjeve të kompanisë.

Dyqanet e Tesla-s, në pronësi të miliarderit amerikan Elon Musk, kanë qenë objektiv i protestave në të gjithë SHBA-në.

Musk, i cili gjithashtu drejton Departamentin e Efikasitetit të Qeverisë (DOGE), po udhëheq përpjekjet për të reduktuar shpenzimet në qeverinë federale të SHBA, gjë që ka rezultuar në pushimin nga puna të mijëra punonjësve dhe anulimin e qindra kontratave të ndihmës amerikane.