Vance në Grenlandë: Ishulli do ishte më i sigurt nën udhëheqjen e SHBA se Danimarkës

Grenlanda është më pak e sigurt tani sesa ishte dekada më parë dhe ishulli do të ishte më i sigurt nën udhëheqjen e SHBA-së sesa nën udhëheqjen daneze, tha sot zëvendëspresidenti i SHBA J.D. Vance gjatë një vizite në Grenlandë.

“Argumenti ynë është në të vërtetë me udhëheqjen e Danimarkës, e cila ka investuar më pak në Grenlandë dhe arkitekturën e saj të sigurisë. Kjo thjesht duhet të ndryshojë. Politika e Shteteve të Bashkuara është se kjo do të ndryshojë”, tha Vance.

Gjatë një vizite në një bazë ushtarake në ishullin danez, ai theksoi se beson se nuk do të nevojitet forca ushtarake që SHBA të pushtojë Grenlandën, raporton Reuters.

“Ne nuk mendojmë se forca ushtarake do të jetë ndonjëherë e nevojshme. Për shkak se ne mendojmë se njerëzit e Grenlandës janë racionalë dhe të mirë, mendojmë se do të jemi në gjendje të bëjmë një marrëveshje të stilit të Donald Trump për të garantuar sigurinë e këtij territori, por edhe të Shteteve të Bashkuara të Amerikës”, tha ai.

Vance përsëriti më parë interesin e SHBA-së për këtë territor gjysmë-autonom danez, duke thënë se ishte i nevojshëm për “sigurinë e popullit amerikan”.

“Ajo që tha Presidenti (Trump) është se ne duhet të kemi një pozicion më të lartë për Grenlandën. Ne kemi nevojë për atë përsëri për sigurinë e popullit amerikan. Dhe ajo që ne mendojmë se do të ndodhë është që banorët e Grenlandës do të zgjedhin përmes vetëvendosjes të bëhen të pavarur nga Danimarka, dhe më pas do të flasim me popullin e Grenlandës prej andej”, tha Vance.

Ai mbërriti sot për një vizitë në Grenlandë i shoqëruar nga bashkëshortja e tij, Usha Vance, Sekretari i Energjisë Chris Wright dhe Këshilltari i Sigurisë Kombëtare Michael Walz.

LEXONI GJITHASHTU:

• Betohet kryeministri i ri i Grenlandës, Jens-Frederik Nielsen
• Kryeministrja daneze vlerëson popullin e Grenlandës për qëndresën ndaj Trump