“Dhunë e terror”- Rusia nis fushatën më të madhe të rekrutimit në 14 vitet e fundit

Rusia ka nisur këtë pranverë fushatën më të madhe të rekrutimit ushtarak që nga viti 2011, duke thirrur 160.000 burra të moshës 18 deri në 30 vjeç për shërbim njëvjeçar ushtarak. Dekreti përkatës u firmos nga presidenti Vladimir Putin në fund të marsit, ndërsa shërbimi i detyrueshëm nisi më 10 prill.

Sipas Ministrisë ruse të Mbrojtjes, rekrutimi pranveror, i cili zhvillohet tradicionalisht dy herë në vit, nuk lidhet me luftën në Ukrainë. Megjithatë, të dhënat tregojnë se në këtë cikël janë përfshirë edhe burra nga rajonet ukrainase të pushtuara nga Rusia; Donetsk, Luhansk, Zaporizhia dhe Kherson.

Sipas Grupit Lindor të të Drejtave të Njeriut të Ukrainës (EHRG), gjatë vjeshtës 2024, të paktën 300 persona nga këto territore u përfshinë në ushtrinë ruse, përfshirë rreth 200 nga Zaporizhia dhe Kherson dhe 100 nga Donetsk dhe Luhansk.

Banorë të rajoneve të pushtuara raportojnë për presion të shtuar nga autoritetet për t’u regjistruar në ushtri. Në mungesë të një ID-je ruse, punësimi apo regjistrimi në universitet është praktikisht i pamundur. Pavarësisht mungesës së dëshmive për rekrutim të detyruar në masë, ekziston një prani e konsiderueshme e vullnetarëve që nënshkruajnë kontrata me ushtrinë.

Në të njëjtën kohë, sistemi i telekomunikacionit dhe shërbimet bazë në këto territore funksionojnë në varësi të dokumentacionit rus, duke e bërë presionin për përfshirje në sistemin ushtarak më të ndjeshëm.

Sipas organizatave të të drejtave të njeriut, shumë prej rekrutëve dërgohen fillimisht për trajnim në Rusi, në rajonet e Rostovit, Krasnodarit apo pranë Shën Petersburgut, e më pas, shpesh, në zonat e luftës. Aktivisti Pavlo Lisyansky thekson se ushtria ruse është nën presion për të mbushur radhët e saj, duke synuar ata që kanë kryer më parë shërbimin ushtarak apo ish-anëtarë të njësive paraushtarake në territoret e pushtuara.

Sipas ligjit rus, refuzimi i shërbimit ushtarak mund të dënohet me deri në dy vjet burg. Të dhënat e organizatave për të drejtat e njeriut tregojnë për qindra çështje penale në Krime kundër atyre që kanë refuzuar mobilizimin, megjithatë dënimet me burg janë të rralla.

Sipas të drejtës ndërkombëtare humanitare, rekrutimi i banorëve të territoreve të pushtuara për në ushtrinë e pushtuesit përbën një krim lufte. Organizatat për të drejtat e njeriut raportojnë raste ku rekrutët nga Krimea dhe zonat e tjera të pushtuara janë përdorur si mburoja njerëzore, duke u dërguar në vijën e parë të frontit pa përgatitje apo pajisje të mjaftueshme.

Të dhënat e fundit nga organizatat monitoruese sugjerojnë se që nga fillimi i pushtimit, mbi 1.800 pjesëtarë të njësive ushtarake ruse me origjinë nga Krimea janë vrarë në konfliktin në Ukrainë.

LEXONI GJITHASHTU:

• Ukraina sanksionon firma kineze, i akuzon se ndihmuan Rusinë të prodhojë raketa
• Liderë të lartë ukrainas, evropianë dhe amerikanë takohen në Paris