Ndihmoi Rusinë në çlirimin e Kurskut, Putin falenderon Korenë e Veriut

Presidenti rus Vladimir Putin ka falënderuar Korenë e Veriut dhe udhëheqësin e saj Kim Jong Un për ndihmën e dhënë në çlirimin e rajonit të Kurskut nga forcat ukrainase. Në një deklaratë të lëshuar nga shërbimi për shtyp i Kremlinit, Putin vlerësoi lëvizjen e Koresë së Veriut si një akt solidariteti dhe miqësie të vërtetë.

“Lëvizja e miqve tanë të Koresë së Veriut u udhëhoq nga një ndjenjë solidariteti, drejtësie dhe miqësie të vërtetë”, theksoi Putin në një deklaratë. “Ne e vlerësojmë shumë këtë dhe i jemi sinqerisht mirënjohës, personalisht Kryetarit të Komitetit të Çështjeve Shtetërore, shokut Kim Jong-un, si dhe të gjithë udhëheqjes dhe popullit të Koresë së Veriut”, tha lideri rus.

“Ne përgëzojmë heroizmin e ushtarëve të Koresë së Veriut, stërvitjen dhe përkushtimin e tyre të shkëlqyer të shfaqur gjatë luftimeve, krah për krah me ushtarët rusë, duke mbrojtur Atdheun tonë si të tyren”, theksoi presidenti rus. “Ata e përmbushën detyrën e tyre me nder dhe trimëri, duke u mbuluar me lavdi të pashuar”, tha Putin.

Operacioni për çlirimin e rajonit të Kurskut u përfundua më 26 prill, dhe shefi i Shtabit të Përgjithshëm të Forcave të Armatosura Ruse, Valery Gerasimov, vlerësoi rolin e ushtarëve të Koresë së Veriut në eliminimin e grupit ukrainas në këtë rajon.

Ky bashkëpunim mes Rusisë dhe Koresë së Veriut është i mbështetur nga një marrëveshje tërësore të partneritetit strategjik, e nënshkruar nga të dyja vendet.

LEXONI GJITHASHTU:

• Koreja e Veriut mbështet Rusinë, dërgon trupa për luftën kundër Ukrainës
• Gjermania thirrje Ukrainës të mos pranojë marrëveshjen e Trump: Është kapitullim