Shpërthimi me 70 të vdekur, Irani: Shkak ishte neglizhenca, po pyeten përgjegjësit

Ministri i Brendshëm i Iranit ka thënë se neglizhenca ishte një faktor në shpërthimin masiv dhe zjarrin në portin më të madh të kontejnerëve në vend, ndërsa numri i të vdekurve u rrit në të paktën 70.

Eskandar Momeni tha se shpërthimi i së shtunës në portin Shahid Rajaee në Bandar Abbas, i cili plagosi gjithashtu më shumë se 1,000 persona, u shkaktua nga “mangësitë, duke përfshirë mosrespektimin e masave paraprake të sigurisë dhe neglizhencën”.

“Disa individë të konsideruar përgjegjës” ishin thirrur për t’u marrë në pyetje, shtoi ai.

Autoritetet doganore kanë thënë se ngarkesa e importuar u përfshi nga flakët dhe shpërtheu. Ministria e mbrojtjes ka mohuar raportet e huaja se bëhej fjalë për një dërgesë të një kimikati për karburant raketash.