Kina do heqë sanksionet ndaj ligjvënësve të BE-së, hap rrugë për bisedime tregtare

Kina do të heqë sanksionet ndaj pesë anëtarëve aktualë dhe ish-anëtarëve të Parlamentit Europian, të cilët kanë kritikuar shkeljet e të drejtave të njeriut, duke hapur rrugën për bisedime tregtare midis dy palëve, raporton Politico, duke cituar një zyrtar të lartë të Parlamentit Europian.

Presidentja e Parlamentit Europian, Roberta Metsola, do t’ua njoftojë lajmin udhëheqësve të grupeve politike në një takim të mbyllur të mërkurën, tha burimi.

Javën e kaluar, një përfaqësues i Metsola konfirmoi se negociatat për heqjen e sanksioneve midis Parlamentit Evropian dhe qeverisë kineze ishin “në fazat përfundimtare”.

Heqja e sanksioneve vjen në sfondin e vendimit të Presidentit të SHBA-së, Donald Trump, për të përmbysur marrëdhëniet tregtare ndërkombëtare duke vendosur tarifa mbi importet, ku tarifat më ndëshkuese bien mbi Kinën. Pasiguria që rezultoi i ka dhënë shtysë negociatave tregtare të BE-së me vendet anembanë botës.

Që kur Kina vendosi sanksione ndaj pesë eurodeputetëve në vitin 2021, Parlamenti Evropian i ka vendosur një veto jozyrtare Kinës, duke e kushtëzuar çdo kontakt të mundshëm diplomatik me heqjen e sanksioneve nga Pekini.

Eurodeputetët nuk i kanë zbutur kritikat e tyre ndaj Kinës, duke argumentuar se politikat agresive tregtare dhe industriale të Presidentit kinez Xi Jinping dhe shkeljet e të drejtave të njeriut nuk duhet të mbeten pa u ndëshkuar.

LEXONI GJITHASHTU:

• Betejat për Rusinë në Ukrainë, rreth 600 ushtarë të Koresë së Veriut të vdekur
• Bullgaria do të bëhet vendi i parë europian me reaktor bërthamor AP1000