Gjykata Supreme e SHBA-së bllokon rifillimin e dëbimeve të shpejta të venezuelianëve

Gjykata Supreme e SHBA-së ka ndaluar administratën Trump të rifillojë shpejt dëbimet e venezuelianëve nga një qendër paraburgimi në veri të Teksasit.

Ky veprim i Gjykatës së Lartë është një nga pengesat gjyqësore të shumta që ka hasur administrata Trump në përpjekjet për të përshpejtuar deportimet e njerëzve që qëndrojnë ilegalisht në SHBA.

Gjyqtarët vepruan pas një apeli urgjent nga avokatët e burrave venezuelianë, të cilët akuzoheshin si anëtarë të bandave.

Ky përcaktim, sipas administratës Trump, bën që ata të jenë të kualifikuar për largim të shpejtë sipas Aktit të Armiqve të Huaj të vitit 1798.

Presidenti Donald Trump shprehu pakënaqësinë e tij duke postuar në platformën Truth Social: “Gjykata Supreme nuk do të na lejojë të dëbojmë kriminelët nga vendi ynë!”

Ky veprim i Gjykatës së Lartë është pjesë e një sërë pengesash gjyqësore që ka hasur administrata Trump për përshpejtimin e deportimeve.

Presidenti dhe mbështetësit e tij janë ankuar se u është dashur të sigurojnë një proces të rregullt ligjor për ata që nuk kanë ndjekur ligjet e SHBA-së për imigracionin.

Gjykata kishte urdhëruar tashmë një ndalim të përkohshëm të deportimeve me një urdhër të lëshuar muajin e kaluar. Zyrtarët dukeshin të gatshëm për të realizuar deportimet menjëherë, sipas raportimeve të Gjykatës.

Çështja e Gjykatës Supreme përqendrohet në mundësinë që njerëzit të kenë të drejtën të kundërshtojnë dëbimin e tyre nga SHBA, pa vlerësuar nëse thirrja e ligjit nga Trump ishte e përshtatshme.

Ndërkohë, Departamenti i Sigurisë Kombëtare ka kërkuar 20,000 trupa të Gardës Kombëtare për të ndihmuar me arrestimet e emigrantëve në të gjithë SHBA, dhe Pentagoni po shqyrton këtë kërkesë të pazakontë.

Zëdhënësja e departamentit, Tricia McLaughlin, tha se kërkesa është për të ndihmuar në zbatimin e “mandatit të dhënë nga populli amerikan të Presidentit Trump për arrestimin dhe deportimin e emigrantëve të paligjshëm kriminelë”.

Diferenca nga trupat e vendosura në kufirin jugor është se këto njësi të Gardës Kombëtare do të vijnë nga shtetet dhe do të përdoren për operacionet e deportimit në brendësi të vendit. Nuk është e qartë pse kërkesa iu bë Departamentit të Mbrojtjes dhe jo shteteve.

Trump ka ndërmarrë një goditje të gjerë kundër imigracionit të paligjshëm, duke lëshuar urdhra ekzekutivë për të ndaluar atë që ai e ka quajtur “pushtim” të SHBA-së.

Aktualisht, SHBA ka deri në 10,000 trupa përgjatë kufirit SHBA-Meksikë për mbështetje administrative, mbikëqyrje dhe përforcimin e murit, ndërkohë që disa trupa janë të autorizuar të ndalojnë migrantët që kalojnë kufirin.

LEXONI GJITHASHTU:

• Trump: SHBA-ja i ka bërë propozim Iranit për programin e tij bërthamor
• Gjykata Supreme mund ta bllokojë urdhrin e Trump për shtetësinë