Sulm me thikë në Holandë, disa të plagosur mes tyre edhe një oficer policie

Një sulm me thikë ka lënë disa persona të plagosur në qytetin Hoofddorp, në Haarlemmermeer të Holandës Veriore, në orët e para të mëngjesit të sotëm. Mes të plagosurve ndodhet edhe një oficer policie, ndërsa një nga të plagosurit raportohet në gjendje të rëndë shëndetësore.

Policia njoftoi se incidenti ndodhi rreth orës 06:00 në rrugën Fanny Blankers-Koenlaan, një zonë e njohur për strehimin e personave me aftësi të kufizuara intelektuale të lehta dhe të moderuara.

“Ka disa viktima, përfshirë një koleg. Autoambulanca të shumta janë në vendngjarje”, thuhet në një deklaratë nga Policia e Njësisë Noord-Holland.

Mediat lokale raportojnë se oficeri i plagosur u transportua me urgjencë drejt spitalit me një automjet policie që ishte dukshëm i njollosur me gjak. Ende nuk është bërë e ditur gjendja e tij shëndetësore, përveç faktit se një nga viktimat ndodhet në gjendje kritike.

Policia ka rrethuar zonën dhe ka nisur hetimet për të zbardhur shkaqet dhe rrethanat e ngjarjes. Nuk është konfirmuar ende nëse ndonjë person është arrestuar në lidhje me sulmin.