Dita e Evropës, presidenti Meta fajëson partitë politike që Shqipëria është ende larg familjes evropiane

Në Ditën e Europës, presidenti Ilir Meta fajëson përfaqësuesit e partive politike që Shqipëria është ende larg realizimit të aspiratës së saj për t’u bërë pjesë e familjes europiane.

Kreu i shtetit thotë se kjo do të ndodhë kur të gjithë përfaqësuesit e partive politike të mendojnë dhe të veprojnë për t’i dhënë forcë zërit të rinisë, për të ndërtuar të ardhmen e sigurt europiane në Atdheun e tyre. Një mesazh e ka edhe për mazhorancën:

“Është koha të ndihmojmë qytetarët tanë dhe Shqipërinë të çlirohet nga çdo formë e regjimeve hibride, për të ecur më shpejt, pa pengesa artificiale, drejt çeljes së negociatave dhe anëtarësimit në Bashkimin Europian”, shprehet kreu i shtetit.

Ndërsa presidenti flet për regjim hibrid, maxhoranca thekson se Shqipëria është më afër se kurrë objektivit strategjik të anëtarësimit përmes procesit të hapjes së negociatave. Ministrja e Jashtme Olta Xhaçka deklaron se qeveria ka bërë të mundur përmbushjen e të gjitha prioriteteve dhe kërkesave specifike, për të afruar vendin me Bashkimin Europian.