Sulmet ruse në Ukrainë vrasin 13 persona, plagosin dhjetëra të tjerë

Sulmet ajrore ruse në Ukrainë kanë shkaktuar viktima dhe dëme të mëdha, me të paktën 13 persona të vrarë dhe 56 të plagosur, sipas autoriteteve rajonale.

Sulmet përfshinë përdorimin masiv të dronëve dhe raketave balistike, duke goditur qytete të ndryshme, përfshirë kryeqytetin Kiev.

Forcat ajrore të Ukrainës raportuan se Rusia lëshoi gjithsej 250 dronë dhe 14 raketa balistike drejt Kievit, duke shkaktuar zjarr dhe dëme të shumta në ndërtesa banimi. Ky ishte një nga sulmet më të mëdha ajrore të kombinuara në kryeqytet që nga fillimi i luftës. Pavarësisht goditjeve masive, forcat ajrore ukrainase arritën të rrëzonin gjashtë raketa dhe 245 dronë.

Në kryeqytet, 14 persona u plagosën, ndërsa të tjera sulme ndodhën në rajone të tjera të Ukrainës, përfshirë Donetskun, Odesën, Khersonin dhe Kharkivin. Rajonet jugore dhe lindore të Ukrainës janë përballur me dëme të konsiderueshme, ndërsa qytetarët e Kievit janë shprehur të shqetësuar për sigurinë e tyre.

Presidenti ukrainas, Volodymyr Zelensky, ka dënuar ashpër sulmet dhe ka theksuar se Rusia është përgjegjëse për zgjatjen e luftës. “Me çdo sulm të tillë, bota bëhet gjithnjë e më e sigurt se shkaku i zgjatjes së luftës qëndron në Moskë,” tha ai.

“Do të doja që ata të bien dakord për një armëpushim,” tha Olha Chyrukha, një banore 64-vjeçare e Kievit, duke shtuar se mbesa e saj trevjeçare po bërtiste nga frika për shkak të shpërthimeve.

Përdorimi i dronëve nga Rusia po bëhet gjithnjë e më i sofistikuar, ndërkohë që zyrtarët ukrainas theksuan se armiku po përmirëson taktikat e përdorimit të dronëve dhe raketave balistike, duke shkaktuar dëme të shumta.

Presidenti Zelensky ka kërkuar sanksione shtesë ndaj Rusisë, duke theksuar se vetëm një ndëshkim i fortë ekonomik mund të detyrojë Moskën të bien dakord për një armëpushim.

LEXONI GJITHASHTU:

• Vance: Epoka e dominimit të pakontestueshëm të SHBA-së ka mbaruar
• Rusia dhe Ukraina shkëmbejnë qindra ushtarë të burgosur lufte