Përmbyset minibusi, humbin jetën 3 shqiptarë nga aksidenti i rëndë në Gjermani

Sipas një njoftimi të Ministria për Evropën dhe Punët e Jashtme, tre shqiptarë kanë humbur jetën në një aksident në Gjermani.

Në njoftim thuhet se 4 persona të tjerë janë plagosur dhe po marrin trajtim mjekësor ndërsa aksidenti ka ndodhur në orët e para të mëngjesit të kësaj të diele.

Ministria për Evropën dhe Punët e Jashtme e Shqipërisë thotë se është informuar nga autoritetet gjermane për ngjarjen tragjike ndërsa thekson se hetimet për rrethanat e aksidentit janë ende në vijim.

Sipas mediave gjermane ,inibusi, me nëntë pasagjerë që po ktheheshin nga një festë familjare në Hesse, doli nga rruga dhe u përmbys disa herë për arsye ende të paqarta.

Njoftimi i plotë 

“Ministria për Evropën dhe Punët e Jashtme është informuar nga autoritetet gjermane për një aksident të rëndë rrugor të ndodhur në orët e para të mëngjesit të datës 25 maj, pranë qytetit Koblenz, ku janë përfshirë disa shtetas shqiptarë.

Me keqardhje njoftojmë se si pasojë e këtij aksidenti kanë humbur jetën tre shtetas shqiptarë, ndërsa katër të tjerë janë plagosur dhe po marrin trajtim në spitalet lokale.

Ambasada e Republikës së Shqipërisë në Berlin dhe Konsullata e Përgjithshme në Mynih kanë qenë në kontakt të vazhdueshëm me autoritetet gjermane dhe kanë ndjekur nga afër zhvillimet.

Ministria për Evropën dhe Punët e Jashtme shpreh ngushëllimet më të sinqerta për familjet e viktimave dhe uron shërim të plotë për të plagosurit.

Strukturat tona konsullore kanë ofruar mbështetjen e nevojshme për qytetarët e prekur dhe kanë qenë të angazhuara gjatë gjithë ditës për të ndihmuar në menaxhimin e situatës.

Për çdo informacion shtesë, lutemi të kontaktoni në: +49 1523 79 13 997”, thuhet në njoftim.

LEXONI GJITHASHTU:

• VIDEO/ Tre viktima nga Shqipëria, detajet e mediave për aksidentin në Koblenz
• Kapet autori i tentativës për vrasje në Shtyllas, tentoi të largohej për në Greqi