Incident gjatë ndihmave për Gazën: 21 persona të vrarë, dhjetëra të plagosur

Një fluks masiv viktimash, përfshirë gra dhe fëmijë, është trajtuar në një spital fushor të Kryqit të Kuq në Gazën jugore pas një incidenti të rëndë pranë një qendre shpërndarjeje ndihmash në qytetin Rafah.

Komiteti Ndërkombëtar i Kryqit të Kuq (KNKK) njoftoi se 21 persona u shpallën të vdekur pas mbërritjes në spital dhe gjithsej 179 të plagosur u trajtuan për plagë nga të shtënat me armë zjarri.

Ky është numri më i lartë i të plagosurve në një incident të vetëm që nga themelimi i këtij spitali fushor më shumë se një vit më parë, tha KNKK, duke theksuar se rasti tejkaloi kapacitetin prej vetëm 60 shtretërsh të objektit.

Agjencia e mbrojtjes civile në Gaza, e drejtuar nga Hamasi, raportoi se të paktën 31 persona u vranë dhe fajësoi “të shtënat izraelite” që, sipas saj, kishin pasur në shënjestër civilët që po përpiqeshin të merrnin ndihma.

Nga ana tjetër, Forcat Mbrojtëse të Izraelit (IDF) thanë se një hetim paraprak tregoi se forcat e tyre nuk kishin qëlluar drejt civilëve pranë ose brenda qendrës së ndihmës. IDF publikoi gjithashtu pamje nga droni, të cilat pretendon se tregojnë persona të armatosur dhe të maskuar që hidhnin gurë dhe qëllonin në drejtim të civilëve në zonën e Khan Younis. BBC theksoi se nuk ka mundur të verifikojë në mënyrë të pavarur vërtetësinë e pamjeve.

“Të gjithë pacientët thanë se kishin qenë duke u përpjekur të arrinin në një vend shpërndarjeje ndihmash”, thuhet në deklaratën e KNKK-së.

Incidenti vjen mes një situate humanitare gjithnjë e më të rënduar në Gaza dhe përshkallëzimit të luftimeve në jug të territorit. Nuk është ende e qartë nëse shifrat e viktimave të raportuara nga Kryqi i Kuq janë të përfshira në totalet e paraqitura nga autoritetet shëndetësore të Hamasit.

LEXONI GJITHASHTU:

• Ukraina kryen sulmin më të madh me rreze të gjatë ndaj Rusisë
• Përshkallëzohen tensionet tregtare, Kina: SHBA ka shkelur armëpushimin e tarifave