Britania 12 nëndetëse të reja bërthamore, Starmer: Të jemi gati për luftë

Kryeministri britanik Keir Starmer njoftoi të hënën se Mbretëria e Bashkuar do të ndërtojë 12 nëndetëse të reja sulmuese dhe 6 fabrika të reja municionesh, si pjesë e Strategjisë për Mbrojtjen.

Dokumenti i hartuar e vë theksin tek 62 rekomandime, të cilat qeveria duhet t’i përmbushë të gjitha, përfshirë zhvendosjen e Forcave të Armatosura në shtetet me gatishmëri luftarake.

“Kur kërcënohemi nga shtete me forca të armatosura të avancuara, mënyra më efikase për t’i zmbrapsur është të jemi gati dhe t’u tregojmë atyre se mund ta arrijmë paqen përmes forcës”, deklaroi Starmer gjatë një vizite në Glasgou.

Plani, shtoi kreu i qeverisë, është një gur themeli për ta bërë Britaninë më të sigurt, më të fortë, të gatshme për luftë, përmes pajisjeve luftarake moderne dhe përmes aleancave me vendet e tjera.

12 nëndetëset e reja, që do të jenë me fuqi bërthamore, do të ndërtohen gjithashtu në kuadër të marrëveshjes AUKUS, e nënshkruar në vitin 2021 mes Australisë, Britanisë së Madhe dhe Shteteve të Bashkuara.

Programi do të shoqërohet nga një buxhet prej 15 miliardë stërlinash, që do të investohen në koka bërthamore.

Një tjetër pikë kyçe e planit është prokurimi i 7 mijë armatimeve me rreze të gjatë veprimi, si dhe shpenzimi i 1.5 miliardë stërlinave për të ndërtuar të paktën 6 fabrika municionesh.

Një nga këto fabrika do të jetë gjithmonë aktive, për të lejuar që prodhimi të avancohet me shpejtësi për të përmbushur nevojat në kohëra kërcënimesh.