I jepet lamtumira e fundit Mitropolitit të Gjirokastrës, Imzot Dhimitri

U zhvillua në qytetin e Gjirokastrës shërbesa e varrimit të Mitropolitit të Gjirokastrës, Imzot Dhimitri.

Ai u nda nga jeta ditën e shtunë, në 28 qershor, në moshën 85 vjeçare ndërsa ishte i shtruar në Spitalin e Përgjithshëm Universitar të Janinës për shkak të problemeve shëndetësore.

Ritet fetare të meshës së varrimit u zhvilluan në Katedralen “Ngjallja e Krishtit” në qytetin e Gjirokastrës. Të pranishëm kanë qenë hierarkë të kishës ortodokse, përfaqësues të politikës nga Shqipëria dhe Greqia, përfaqësues të besimeve të tjera fetarë, besimtarë të shumtë, etj. Shërbesa e varrimit u kryesua nga Kryepiskopi i Tiranës, Durrësit dhe gjithë Shqipërisë, Imzot Joani

Besimtarët vlerësuan kontributin fetar dhe aktivitetin human të Imzot Dhimitri.

“Që me hapjen e kishave pas regjimit komunist Hirësi Dhimitri,  ju afrua kishës së Shqipërisë për të dhënë kontributin e tij,  jo vetëm për besimin por  për mbarë shoqërinë njerëzore në Shqipëri,  që pas vitit ’90-të deri në frymën e tij  të fundit ai shërbeu me devotshmëri jo vetëm në kishë por edhe në  shkollat që ne kemi, tek njerëzit në nevojë, jetim, të varfër,  dhe vazhdimisht ishte pranë tyre duke ndihmuar dhe kontribuar  për ata”, tha At Emiljano.

“Të vjen keq sepse ikën njeri, është ikja e një njeriu që humbet komuniteti, një njeri që ishte adapt, ishte kryesor për atë punë që bënte”, u shpreh një besimtare.

Në përfundim të meshës së varrimit, kortezhi mortor udhëtoi drejt fshatit Dervician ku Mitropoliti i Gjirokastrës, Imzot Dhimitri do të prehet në kishën e “Shën Parashqevisë”.